Cuerpo Policial Aruba a celebra su 40 aniversario
Cu un Santo Sacrificio di Misa na Playa, Cuerpo Policial Aruba (KPA) a conmemora su 40 aniversario, den presencia di autoridadnan, invitadonan special, pensionadonan, miembronan di e cuerpo y comunidad cu a uni den oracion pa gradici y pidi proteccion pa tur polis cu diariamente ta sirbi nos pais.
Minister di Husticia, mr. Drs. Arthur Dowers a felicita KPA cu e bunita celebracion aki y a destaca cu, apesar cu durante 40 aña hopi cos a cambia den trabou policial y den e forma cu criminalidad ta manifesta, integridad ta sigui di ta un di e fundeshinan principal di Cuerpo Policial. Confiansa di pueblo, profesionalismo y transparencia ta esencial pa un cuerpo policial fuerte.
Ta reconoce tambe e reto actual di falta di personal y a reafirma e compromiso di Gobierno pa recluta y prepara mas polis hoben, pa fortalece KPA y garantisa continuidad pa futuro.
Despues di misa, delegacionnan policial di Aruba, Hulanda, Corsou, Boneiro, Saba, St. Eustatius, Sint Maarten y Suriname a participa den un desfile oficial, simbolisando e cooperacion y compromiso comparti den lucha contra criminalidad.
Pabien na Cuerpo Policial Aruba cu 40 aña di dedicacion, integridad y servicio na pueblo di Aruba!
The post Cuerpo Policial Aruba a celebra su 40 aniversario appeared first on 24ora - Prome Den Noticia.
16.8.2026. 12:15:00