Cruz Cora Aruba y Kiwanis Club of Aruba a yuda shen mucha cu nan necesidadnan pa aña escolar nobo

E regreso na scol ta trece emocion grandi, pero tambe retonan financiero pa hopi hogar na Aruba. Pa alivia e peso aki, Cruz Cora Aruba conhuntamente cu Kiwanis Club of Aruba, Kiwanis Palm Beach y Kiwanis San Nicolas a organisa un bunita proyecto na Centro di Bario Dakota diadomingo ultimo pa sostene shen mucha cu tur nan necesidadnan p’e aña escolar nobo. Indra Pereira, Marketing Manager di Cruz Cora y Presidente di Kiwanis Club of Aruba, a splica cu despues di varios luna di planificacion, a logra brinda un dia inolvidabel. Cu cooperacion di Fofoti Tours, a transporta e muchanan for di San Nicolas y Santa Cruz pa Geekay pa scoge jeans y keds nobo. Na Centro di Bario Dakota, nan a ricibi corte di cabey, a participa den weganan deportivo di IBiSA y recreacion cu Gilmar Maduro. Ademas, Departamento di Salud Publico a duna un tayer di higiena personal y Cruz Cora a duna sesion di prome auxilio y preparacion pa horcan. E dia a cera cu un presentacion sorpresa. Onasito Thiel, Chairman di comision Back to School di Kiwanis Palm Beach, a resalta cu e proyecto aki tin 15 aña activo. E sosten no ta solamente tas, sino uniform, paña, material escolar y hasta pago di schoolgeld. E aña aki a drenta peticion pa 250 mucha, pero pa motibo di limitacion financiero a logra yuda shen mucha. E union comunitario aki ta demostra e balor grandi di solidaridad, garantisando asina cu e muchanan por cuminsa nan aña escolar debidamente prepara, motiva y contento. Pa mas detaye lesa TREMPAN. The post Cruz Cora Aruba y Kiwanis Club of Aruba a yuda shen mucha cu nan necesidadnan pa aña escolar nobo appeared first on 24ora - Prome Den Noticia.