Caribbean Band a celebra diesdos aña di existencia

Caribbean Band, un di e agrupacionnan musical mas conoci di Aruba, a celebra recientemente nan di 12 aniversario cu un evento special na Chill Cafe. E celebracion aki no tabata solamente un recordatorio di nan añanan di trayectoria, pero tambe a sirbi como plataforma pa presenta musica nobo y proyectonan audiovisual cu ta promete di sigi fortalese e lazo cu nan fanaticonan. Felix Stamper, director di Caribbean Band, a informa cu e grupo a yega na su 12 aña di existencia y ta preparando diferente proyectonan nobo. Como parti di e celebracion, e banda a expresa su danki na tur su fanaticonan cu ta sigui apoyando nan durante diferente presentacionnan y eventonan. Durante e anochi di celebracion, cantante Lito Orman a presenta un tema nobo den estilo zouk, titula “Bo tin mi ziek”. E cantica ta un composicion di Janiro Eisden, cu Isabela como areglista, hunto cu Felix Stamper. Caribbean Band tambe ta preparando un video clip p’e tema, cu segun e grupo pronto lo ta disponibel riba diferente plataforma di social media. Cantante Lyrza Lansiquot a probecha e ocasion pa lansa su cantica nobo, “Amor di mi bida”, un bachata romantico cu ta trata di un amor special y cu por ta dedica na un persona importante. Lansiquot a expresa su felicidad cu e lansamento. Di otro banda, e cantante Nohely “Barona” Canngieter a invita henter pueblo di Aruba pa sigui duna nan sosten y pa presencia e presentacionnan di Caribbean Band. El a recorda cu e fanaticonan por sigui disfruta di nan musica, incluyendo e sun di  “Barona”, via nan presentacionnan y riba YouTube. Caribbean Band ta sigui combina su celebracion di 12 aña cu musica nobo y proyectonan pa mantene e conexion cu su publico y sigui crece riba e escena musical local. The post Caribbean Band a celebra diesdos aña di existencia appeared first on 24ora - Prome Den Noticia.