Caminda dilanti supermercado no ta Palo Marga: Kier polis drumi na Mabon

E habitantenan di Mabon ta pidi medida urgente pa mehora e siguridad di e peatonan y baha e velocidad di e vehiculonan den e area di Mabon. Astrid Solognier, habitante di Mabon, a expresa su preocupacion p’e situacion di trafico dilanti di Famia Supermarket, unda, segun su relato, e chauffeurnan no ta duna preferencia n’e peatonan cu ta kier crusa caya. E ta indica cu, ademas di no para pa duna e peatonan paso, tin chauffeur cu ta circula na velocidad halto. Segun Solognier, aunke tin chauffeur cu ta para pa duna paso, e peatonan hopi biaha mester warda pa largo rato prome cu nan por crusa. P’e motibo aki, e ta pidi n’e minister concerni pa instala polis drumi den e area pa obliga chauffeurnan baha velocidad. N’e otro banda di caya tambe tin un crèche, unda, segun e habitantenan, e mayornan ta enfrenta dificultad pa crusa caya cu nan yiu pasobra chauffeurnan no ta para pa duna paso. Juni Halley tambe ta un  habitante di Mabon y el a afirma cu e problema ta mas evidente den e oranan di mainta trempan, anochi y durante e eventonan na Palomarga. Segun Halley, tin chauffeur cu ta core na velocidad excesivo, hasta na un manera cu por tende e lastra di brake, sin cu e chauffeur parce di paga tino riba e señalnan di trafico y e zebrapad cu ta cerca di Scol Cristo Rey. Halley ta recorda cu den e area aki, aña pasa, tabatin caso unda un peaton a perde su bida den un accidente di trafico, mientras cu accidentenan ta sigui tuma luga. Rosety Geerman, cu ta bibando na Mabon pa 12 aña caba,  tambe a expresa su preocupacion p’e situacion. Segun Geerman, durante su añanan den e bario, el a presencia varios situacion desagradabel relaciona cu trafico. The post Caminda dilanti supermercado no ta Palo Marga: Kier polis drumi na Mabon appeared first on 24ora - Prome Den Noticia.