Pastoor Balootje: Cas sin regla ta produci muchanan sin disciplina

Maske cuanto institucion tin mundialmente cu ta defende derecho di mucha, e mayor mester pone regla den su cas. Regla no ta pa castiga, ni tampoco pa discrimina, pero ta pa sembra bon educacion y disciplina den cada hogar. Ta con porta posibel cu un mucha y su mayor ta discuti cu otro cu palabra sushi? Ta con porta posibel cu un mucha ta bisa cu e ta bay sali, y e no ta pidi su mayornan pa e sali? Ta con porta cu un mucha ta exigi cosnan nobo pa scol, mientras cu esunnan cu tin actualmente ta bon? Ta con porta cu un mucha ta exigi jeans di marca pa e bay scol? Ta con porta cu un mucha ta exigi un telefon mas moderno cu esun cu e tin actualmente? Ta con porta cu un mucha ta lanta cu su mayornan pasobra nan no ta permiti e sali laat anochi? Ta con porta cu un mucha ta bay un fiesta y su mayornan no sa na unda e fiesta ta? Ta con porta cu un mucha ta bin cas burachi y kier bringa cu su mayor? Ta con porta cu un mucha ta bin ta zundra cu cuminda no ta cla ora e yega for di scol? Ta con porta cu un mucha ta nenga di come locual cu tin na cas y ta pidi fast food? Ta con porta cu un mucha ta nenga di bari cas of laba tayo? Ta con porta cu un mucha ta nenga di tene su camber limpi? Ta con porta cu un mucha no por laba su propio paña? Ta con porta cu un mucha no gusta baña y mantene higiena? Ora un mucha ta malcria hasta su cas e ta rechasa. Laga nos wak e otro banda: Ta con porta cu un mayor ta bebe tur placa y no ta cumpli cu su deber di mantene su yiu. Ta con porta cu un tata tin varios muhe y mientras cu su propio yiunan ta pasa necesidad. Ta con porta cu un tata ta cumpra auto pa byside y e no por cumpra laptop pa su yiu. Ta con por ta posibel cu alcohol y droga ta mas importante cu famia? Ta con por ta cu paranda y gosa bida ta un obstaculo pa cria yiu? Ta con por ta cu placa di scol ta wordo uza pa gamble? Comporta posibel cu den un cas mama cu yiu of tata cu yiu ta manipula otro pa motibo di placa? Tur cos ta sali for di man ora den un cas no tin regla, no tin respet, no tin pordon, y mas cu tur cos no tin temor di Dios, pasobra den e situacion ey, e mayor no tin control, y caminda no tin control, y no tin coreccion,tampoco disciplina. Orden ta bini di Dios, pasobra Dios ta un Dios di orden. Cas di Dios ta un luga di orden. Pulpito mester wordo respeta. Ayuno y oracion mester ta pilar di iglesia. Liberacion mester ta activo den iglesia. Mester duna cuenta na Dios y na congregacion. Mester bin bek na e prome amor y haci locual Dios a manda pa haci. Bara y reprendemento, ta duna sabiduria, ma un yiu laga pa su cuenta, ta pone su mama na berguensa (Proverbionan 29:15). No laga placa y material domina den cas, pasobra ora no tin regla, berguensa ta loer tras di porta y e dolor lo bini pa e mayor. Caminda Cristo Hesus ta na prome luga, semper lo tin orden y respet. The post Pastoor Balootje: Cas sin regla ta produci muchanan sin disciplina appeared first on 24ora - Prome Den Noticia.