Minister Dowers: Gobierno a presenta denuncia riba iregularidad den RDA y ta spera decision di Huez tocante investigacion

  Minister di Husticia, Arthur Dowers, a confirma cu Gobierno di Aruba a presenta un denuncia formal relaciona cu indicacion di posibel iregularidad na RDA. Segun minister Dowers, despues cu a ricibi informacion tocante e indicacionnan aki, Gobierno a sigui e proceduranan legal y a presenta e denuncia na Ministerio Publico pa evaluacion. Minister Dowers a splica cu Ministerio Publico posteriormente a comunica cu e denuncia no lo sigui procedura di investigacion, indicando cu limitacion di capacidad operacional como motibo pa e decision. “E ta un decision cu ta pertenece exclusivamente na Ministerio Publico,” minister Dowers a expresa. El a indica cu, conforme e mecanismonan legal cu tin disponibel, e persona of instancia cu presenta e denuncia tin e derecho di recuri na Huez y solicita cu un investigacion tuma luga. Segun Dowers, precisamente esey ta e siguiente paso cu Gobierno a tuma. “Awor nos ta spera riba e decision di Huez tocante e peticion pa instrui Ministerio Publico pa sigui cu e investigacion.” Minister Dowers a expresa cu lamentablemente, cu limitacion di personal por resulta den un investigacion no sigui dilanti, resaltando cu e ta importante pa e proceso legal sigui su curso pa por trece claridad den e asunto. El a conclui cu Gobierno ta respeta independencia di e instancianan hudicial, mientras cu ta spera e pronunciamento di Huez.   The post Minister Dowers: Gobierno a presenta denuncia riba iregularidad den RDA y ta spera decision di Huez tocante investigacion appeared first on Aruba Native.