Preocupante : Hopi mucha ta forma parti di gangnan cu ta causa violencia y tiramento na Aruba

ORANJESTAD – E situacion di criminalidad hubenil ta hopi preocupante. A sali na cla cu muchanan ta keda sin bay school y ta forma parti di gangnan na Aruba. ARUBA NATIVE por a compronde cu hopi mucha ta keda sin bay school pa bay forma parti di gang pa asina nan ta sinti nan mes cu status, respet. Hopi di e gangnan ta dedica den asuntonan di droga, maltrato y tiramento. Recien Aruba a wordo sacudi cu dos caso di asesinato di hoben tras di otro. Ministerio Publico den su raport ta mustra e preocupacion grandi cu tin pa cu criminalidad hubenil. CRIMINALIDAD TA CONCENTRA DEN 8 BARIO Riba orden di Procurador General mr. Flanegin di Ministerio Publico, e experto riba criminalidad, dr. Henk Ferweda di Bureau Beke, a haci un investigacion profundo na Aruba y a traha un raport riba e criminalidad den hubentud. E raport ta mustra cu, criminalidad na Aruba ta concentra diferente barionan esta: Pos Chiquito, Sabana Basora, Cayennastraat, Village, De Vuyst, Madiki, Dakota y Sero Patrishi. Mas cu mitar di e casonan ta relaciona cu maltrato, menaza y violencia publico. Loke ta preocupante ta e posecion di arma di candela cu ta sigui crece. Armanan ta bin for di Venezuela y Colombia. HENDE MUHER ENVOLVI E raport ta mustra cu e cantidad di hende muher envolvi den criminalidad a aumenta. Na 2024 el a subi na 25 %. Na mes momento ta constata cu hopi hende muher ta bira victima di maltrato. TIN 15 PA 16 GANG ACTIVO DEN BARIONAN E investigacion ta mustra cu e situacion economico na Aruba ta depende di turismo. E gastonan halto pa por tin un bida normal y e entrada abao riba mercado ta haci cu hopi famia ta consisti di e mama so, kende ta haci diferente trabao pa por mantene e famia. Esey ta trece cun’e cu no tin suficiente supervision riba e muchanan cu e consecuencia cu muchanan ta keda sin bay school y ta bay forma parti di gangnan. E muchanan ta forma parti di gang pa busca identidad, respet y union pafor di school y famia. Tin 15 pa 16 gang den barionan na Aruba y muchanan ta sinti nan mes cu poder y status, formando parti di gang. E gangnan ta envolvi den droga, menaza, maltrato, uso di arma di candela. Esaki ta un desaroyo sumamente preocupante y Procurador General di Ministerio Publico a informa Minister di Husticia di e situacion y e problemanan cu ta confrontando pa por atende debidamente cu e problema serio aki. The post Preocupante : Hopi mucha ta forma parti di gangnan cu ta causa violencia y tiramento na Aruba appeared first on Aruba Native.