Закончени 50. Водицов камп

РУСКИ КЕРЕСТУР – Водицов камп за младих од 6. класи и старших, почал штварток, 6. авґуста, а тирвал до нєдзелї 9. авґуста у Марийовим святилїщу Водица. Були то успишни 50. духовни вежби за младих на хторих ше бешедовало о живоце святих, о хторих преподавали парох зоз Петровцох о. Владимир Седлак, о. Ярослав Варґа и ш. Франциска зоз Руского Керестура и патер Йосип зоз Бачу. До значеня святосци на першим преподаваню уведол домашнї священїк o. Ярослав Варґа, бешедуюци о тим „Цо значи святосц”, а о бл. Йосафати преподавала ш. Франциска Цупер. Госцуюци священїк о. Владимир Седлак парох зоз Петровцох зоз Горватскей мал наисце успишни и барз интересантни преподаваня о младих святих хтори през свойо животи дали приклад як млади чловек може шицки свойо интересованя пошвециц Богу и ближнїм, та бешедовал о св. Карлови Акутисови, бл. Ани Колєсар и о бл. Петрови Павлови Оросови. Всоботу, 8. авґуста учашнїки Водицового кампу були у Бачу, дзе патер Йосип зоз Францисканскей церкви бешедовал о св. Клари и св. Францискови. През шицки днї Водицового кампу окрем преподаваньох учашнїки мали рижни спотски активносци, духовни розгварки зоз священїками, цо була нагода за духовну обнову младих. Штиродньови Водицов камп орґанизовали Марийово дїло, Каритас Руски Керестур и Парохия св. о. Миколая зоз Руского Керестура. Преподаваня могло провадзиц и онлайн на ФБ боку Катедрала св. Николая. The post Закончени 50. Водицов камп first appeared on Руске слово.