Мож донирац за „Днї керестурскей паприґи”

РУСКИ КЕРЕСТУР – Привредно-туристично-културна манифестация „Днї керестурскей паприґи”, того року уж штернаста, будзе отримана 22. авґуста у центру валала, зоз кус вименєнима змистами, насампредз пре нєдостаток финансийох. Як потолковала Душица Орос спред Здруженя продуковательох паприґи „Капсикум анум” котре ношитель орґанизациї, пре нєдостаток финансийох, „Днї керестурскей паприґи” того року буду орґанизовац зоз власних средствох, насампредз дзекуюци спонзором, як подприємством, так и валалчаном, и членом здруженя. Шицки змисти буду отримани, а вименка лєм же вечар нє наступи познатши бенд або ґрупа, алє бенд Касиус зоз валалу. Попри тим, як потолковала Оросова, того року ше им нє удало обезпечиц шатри, столи и лавки и тенди зоз Кули, та шицки викладаче ше буду мушиц остарац сами за свойо штанди. Плановане же ше представя хемийни, нашеньски и осиґуруюци подприємства, потим буду и штанди на котрих годно виложиц и предавац продукти домашнього виробнїцтва, и польопривредни продукти. Як уж традиция наклада, и числени єдла зоз котлох и други специялитети з котрима домашнї кухаре укажу свойо схопносци. Будзе традицийни дефиле парадних запрагох, а за наймладших учашнїкох маскенбал на тему паприґи и польопривреди, пригодна културно-уметнїцка програма, и награди за найлєпши штанд, найориґиналнєйшу маску, и найчежшу паприґу. Перши єдла зоз котлох буду приготовени уж на поладнє, на 17 годзин дефиле парадних запрагох, на 17:30 отверанє манифестациї, а на 18:30 маскенбал (сход у парку при замку од 18 г.), а потим додзельованє наградох у вецей катеґорийох. Орґанизацию мож помогнуц ище вше зоз донациями, особнє при орґанизаторох, або на жиро рахунок Здруженя продуковательох паприґи Капсикум анум 340-11011921-39. The post Мож донирац за „Днї керестурскей паприґи” first appeared on Руске слово.