Armanan di candela ilegal a cobra bida di dos hoben den menos di 2 luna

ORANJESTAD, Aruba – Morto di dos hoben bou di 20 aña den incidente cu arma di candela ta bolbe shock Aruba y a pone un biaha mas e problema di armanan ilegal den centro di atencion. Den menos di 2 luna dos hoben ta perde nan bida, lagando famianan y amistadnan kibra pa semper. Pa un isla chikito manera Aruba, e aumento di violencia cu arma di candela no por bira algo cu nos tin cu acepta como “normal”. Segun cifranan oficial, posesion ilegal di arma di candela a subi na 86 caso registra den 2025, convertiendo e delito ey un biaha mas den e dies delitonan mas comun riba nos isla. Investigacionnan tambe ta mustra cu violencia y uso di arma ta un preocupacion serio entre hobenan. Realidad ta cu ningun departamento por gana e bataya aki nan so. KPA[POLIS] ta haci su parti, pero e ultimo campaña “Entrega bo arma of nos ta bin buske” a mustra cu solamente accion policial no ta suficiente. E lucha contra armanan ilegal mester cuminsa na e raiz, cu cooperacion estrecho entre Douane, Polis, Openbaar Ministerie y tur otro autoridadnan competente y pa reenforsa controlnan na waf, frontera y den comunidad. Comunidad tambe ta hunga un rol importante pa semper ta atento y tuma contacto cu autoridad[via tiplijn] si sa algo relaciona cu armanan di candela den circulacion. Si no tin un enfoke coordina, e problema lo sigui crece y pone mas bida inocente na riesgo. Aruba ta biba di su reputacion como un destinacion turistico safe. Ban spera cu nunca e sosode, pero un incidente grave cu un turista victima di violencia cu arma di candela por causa un daño enorme na nos imagen internacional y na nos economia. Pa e motibo ey, e momento pa actua ta awor, no despues di e siguiente tragedia. Tur cos ta posibel ora tin boluntad politico, liderazgo y prioridad. Den e caso aki, no tin espacio pa excuus. The post Armanan di candela ilegal a cobra bida di dos hoben den menos di 2 luna appeared first on Aruba Native.