Binti graduado na SPO (Scol Practico pa Ofishi) – MBO Niveau 1: Un logro historico pa educacion na Aruba

Minister di Educacion, mr. Gerlien Croes, cu gran orguyo y satisfaccion, ta fungi como testigo di un logro den historia di nos pais. Dialuna, 13 di juli 2026, a celebra e graduacion di e prome 20 graduadonan di SPO (Scol Practico pa Ofishi) cu a haya nan diploma riba nivel di MBO 1 (ABO 1). E logro aki ta marca un paso firme padilanti den e desaroyo educativo di Aruba. E prome grupo di graduadonan aki a finalisa nan estudio exitosamente den e siguiente direccionnan structural: ·         Assistent Bouwen, Wonen en Onderhoud ·         Assistent Dienstverlening ·         Assistent Horeca Tur e trayectorianan aki ta cay bou di e capa di MBO Niveau 1. Minister Gerlien Croes ta extende su mas sincero y caluroso pabien na cada un di e studiantenan aki cu a demostra perseverancia, disciplina y un gran deseo di supera. Un aspecto ricamente positivo ta cu algun di e alumnonan aki lo no para aki; nan lo sigui enrikece nan conocemento y lo continua nan estudio riba nivel 2 di OABA. Esaki ta un muestra bibo cu ora nos duna e studiante e atencion rekeri, e hermentnan corecto y nos empodera nan, nan ta capabel pa logra yega semper mas cerca di nan potencial maximo. Ministerio di Educacion, bou encargo di Minister mr. Gerlien Croes ta enfatisa su compromiso pa sigui habri caminda pa un educacion inclusivo y di calidad, caminda tur hoben ta haya e oportunidad pa briya. Masha pabien na e 20 graduadonan, na nan famia y na SPO. Nos ta orguyoso di e logro aki y lo sigui traha pa crea mas colaboracion y oportunidad unico pa e futuro generacion di nos isla. The post Binti graduado na SPO (Scol Practico pa Ofishi) – MBO Niveau 1: Un logro historico pa educacion na Aruba appeared first on 24ora - Prome Den Noticia.