Dialuna awo: Hospital lo drecha su sistema di airco

Horacio Oduber Hospital (HOH) hunto cu Stichting Onroerend Goed Aruba (SOGA) ta informa tur pashent interna den HOH, pero tambe bishitantenan, empleadonan y alabes comunidad completo cu durante anochi di 20 di juli venidero te mainta trempan di 21 di juli lo tuma luga trabounan importante di reparacion na e sistema di aircondition. Pa por haci e trabounan aki di un forma sigur y responsabel, lo paga e sistema di aircondition temporalmente for di 11:45 pm te cu aproximadamente 5:00 am. Ta compronde cu esaki por causa algun incomodidad, specialmente pa pashentnan interna den hospital, nan famianan y tambe e empleadonan. Pa e motibo aki a prepara diferente medida pa limita e impacto di e reparacion aki y pa mantene tur hende lo mas comodo posibel durante e orarionan di reparacion. E trabounan di reparacion ta necesario pa garantisa cu den futuro e sistema sigui funciona di un forma confiabel y pa sigui brinda un ambiente sigur y agradabel pa tur hende cu ta sea interna, ta di bishita of ta traha na hospital. Ta pidi disculpa pa cualkier incomodidad cu esaki por causa y tambe gradici tur hende pa nan comprension, pasenshi y cooperacion mientras nos ta realisa e trabounan importante aki. The post Dialuna awo: Hospital lo drecha su sistema di airco appeared first on 24ora - Prome Den Noticia.