Cuerpo Consular di Aruba a firma buki di condolencia como muestra di solidaridad cu Venezuela

Diabierna mainta Cuerpo di Consular di Aruba a pasa na Consulado di Venezuela pa asina firma buki di condolencia como muestra di solidaridad cu e pueblo Venezolano despues di e temblornan siman pasa cu a laga hopi hende morto y desapareci.  Presidente di e cuerpo consular y tambe consul di Republica Domincana en Aruba, Luis Eludis Perez a duna entrevista breve cu nos di 24ora.com. “Aki nos ta, miembro di e directiva di Asociación di Cuerpo Consular. Consul di Colombia, Gustavo Serrano; consul di Mexico; Natasha di Costa Rica; Cecilia y Prakash di India. Tin algun otro miembro cu, pa diferente motibo, no por a ta presente awe, pero e directiva a desea bini pa expresa na pueblo, gobierno y tur Venezolanonan, na unda cu nan ta den mundo, nos profundo pesar, nos solidaridad y nos condolencia pa tanto bida cu desgraciadamente a perde durante e tragedia aki. E noble pueblo Venezolano ta pasando pa un momento hopi dificil, y nos, como pueblo solidario, cu ta sinti e dolor cu Venezuela ta pasando, nos a bin pa mustra nos apoyo por medio di e consul di Venezuela aki na Aruba. Door di dje, nos kier manda un brasa fraterno na henter pueblo Venezolano y haci nan sa cu nan por conta cu nos solidaridad y e sentimento di hermandad di tur e paisnan cu nos ta representa aki na Aruba. Nos lo sigui para na banda di nan, no solamente den e momento dificil aki, sino tambe durante e proceso di recuperacion y reconstruccion di Venezuela. Nos tin fe cu e pais lo logra lanta atrobe y lo recupera e grandeza cu hopi di nos a conoce y admira. Ademas di nos presencia como directiva, nos kier expresa nos respaldo y solidaridad cu tur e tragedia cu Venezuela ta biba. For di nos curason, nos ta gradici profundamente, na nomber di pueblo Venezolano y su gobierno, tur e apoyo y solidaridad cu a wordo ricibi di diferente paisnan ruman durante e situacion dificil, Eludis Perez a finalisa bisando.  The post Cuerpo Consular di Aruba a firma buki di condolencia como muestra di solidaridad cu Venezuela appeared first on 24ora - Prome Den Noticia.