OPPA ta pidi: No laga e pensionadonan afo di Dialogo Nacional

Luna pasa un biaha mas e Organisacion di Pensionadonan Publico di Aruba (OPPA) a manda un carta pa Prome Minister mr. Mike Eman den cual ta reacciona riba un proposicion cu a bini dilanti den e Dialogo Social. Nan ta sinti cu temanan cu mester trata den un Dialogo Social mester ta hopi mas cu solamente salario of condicion laboral. Den e carta OPPA ta bisa cu nan pregunta principal no ta solamente: “Kende ta cumpli cu e criterio di ILO?” sino tambe: “Kende por contribui na e solucion di e problemanan nacional cu Aruba ta enfrentando?” E criterio di ILO normalmente ta enfoca riba e partnernan social tradicional: gobierno, empleadornan y trahadonan. Pero Aruba tin circunstancia y reto hopi particular. E temanan cu lo trata den un Dialogo Social no ta solamente salario y condicion di trabou. E temanan ta inclui: costo di bida; pension y siguridad social;  salud publico;  digitalisacion di servicio publico;  transporte;  vivienda;  pobreza; desaroyo economico; sostenibilidad fiscal. Den tur e temanan aki, e pensionadonan ta representa un grupo importante di e poblacion. Y OPPA ta sugeri pa considera e siguiente argumentonan: 1. Dialogo Social mester ta inclusivo “Si nos ta busca solucion nacional, nos mester tende tur e bosnan cu ta afecta directamente pa e decisionnan. Pensionadonan ta mas cu 30% di nos poblacion y nan no por keda sin representacion.” 2. Pensionadonan ta un stakeholder legitimo “Tur decision tocante costo di bida, AZV, AOV, impuesto, digitalisacion y transporte ta afecta e pensionadonan directamente. Si no tende nan bos, e dialogo no ta completo.” 3. ILO ta un minimo, no un maximo “E criterio di ILO ta identifica e partnernan principal, pero no ta prohibi participacion di otro sectornan relevante. Hopi pais ta invita e organisacionnan di pensionado, ONG’s y otro grupo civil ora e tema ta toca nan directamente.” 4. Aruba tin un realidad diferente. “Aruba ta un comunidad chikito. “Nos forsa ta precisamente cu nos por reuni diferente sector na un mesa pa busca solucion hunto. Exclui grupo relevante no ta fortalece e dialogo; e ta limita e dialogo.” 5. OPPA no ta pidi privilegio. “OPPA ta pidi un oportunidad pa contribui cu experiencia y conocemento di un grupo grandi di ciudadano cu a traha y contribui na Aruba durante decenianan.” 6. Exclusion por crea mas division “Si e meta ta crea consenso nacional, exclui sectornan importante ta manda e mensahe cu nan preocupacionnan no ta conta. Esaki por crea mas resistencia en bes di mas cooperacion.” Ta importante pa tene cuenta cu lo siguiente: “Un Dialogo Social cu no inclui e bos di e pensionadonan, e comerciantenan y otro sectornan relevante ta core e riesgo di bira un dialogo entre algun grupo solamente, en bes di un dialogo nacional.” “Aruba no mester menos participacion, Aruba mester mas participacion. E retonan cu tin dilanti di nos ta demasiado grandi pa laga algun sector relevante afo di mesa.” Segun OPPA, e meta mester ta pa pone enfasis riba unidad, inclusion y solucion di e problemanan nacional. En bes di un pelea tocante ken tin derecho of no tin derecho pa sinta na mesa, no ta gana e apoyo positivo di e opinion publico. Te ey e carta di OPPA. The post OPPA ta pidi: No laga e pensionadonan afo di Dialogo Nacional appeared first on 24ora - Prome Den Noticia.