Uni den solidaridad: Gobierno di Aruba a firma registro di condolencia dedica na tur victima di temblor devastador na Venezuela

For di e prome momento despues di e fuerte temblor cu a sacudi Venezuela siman pasa, Gobierno di Aruba, comunidad y diferente organisacion a uni nan mes pa brinda apoyo na e victimanan. Diabierna mainta, Prome Minister mr. Mike Eman, hunto cu Minister drs. Mervin Wyatt-Ras, a bishita Consulado di Venezuela na Tanki Flip pa firma e registro oficial di condolencia. Cu e gesto aki, Gobierno di Aruba a expresa su profundo solidaridad cu e pueblo Venezolano y cu e famianan cu a perde nan sernan stima. Mientrastanto, Aruba ya caba a logra hiba asistencia na Venezuela. Un team di 11 boluntario di Cruz Cora Aruba y Crisis Management Office (CMO) ya caba ta trahando den La Guaira, unda nan ta brinda apoyo den e operacionnan di emergencia hunto cu varios otro ekipo internacional. Ademas, comunidad a responde cu hopi generosidad na e yamada di ayudo. Durante e ultimo dianan a logra colecta un gran cantidad di producto di prome necesidad, incluyendo awa, cuminda, remedi, paña y otro articulo esencial. Diferente barco a sali rumbo pa Venezuela cu e prome cargamento di asistencia humanitario. E respuesta rapido di Gobierno di Aruba, boluntario, empresa y ciudadano ta mustra e fuerte sentido di solidaridad cu caracterisa nos pueblo den momento cu un pueblo bisiña ta enfrentando un calamidad di e magnitud aki. The post Uni den solidaridad: Gobierno di Aruba a firma registro di condolencia dedica na tur victima di temblor devastador na Venezuela appeared first on 24ora - Prome Den Noticia.