Prome Minister Mike Eman a ricibi turistanan cu a scoge Aruba como destino pa tres decada caba

Rick y Dede Grosser ta un ehempel di e relacion estrecho cu hopi bishitante sa crea cu Aruba. For di 1991 nan ta bin Aruba cada aña, y durante tur e tempo ey nan no a stop ni un solo aña. Cu e pasion cu nan tin pa Aruba, nan a comparti e amor pa nos isla cu henter nan famia.  Nan yiu muhe tambe a crece cu Aruba como un destino special. Desde cu e tabatin cinco aña di edad, el a cuminsa bishita nos isla, y awor e ta bini Aruba pa 30 aña caba. E aña aki nan a bin cu aproximadamente 40 miembro di famia, haciendo di Aruba un luga di reunion familiar. E siman aki Rick y Dede Grosser, hunto cu un grupo di nan famia, a haci un bishita di cortesia na Prome Minister Mike Eman acompaña pa Parlamentario Carlos Bermudez. Un otro ehempel di pareha cu ta keda scoge Aruba como nan destino ta Juliana Elias y Philip Decesario. Nan tin 15 aña ta keda bin Aruba, di cual 13 aña consecutivo, demostrando cu Aruba ta sigui ocupa un luga special den nan curason. Prome Minister Eman tabatin solamente palabra di aprecio y gratitud pa sigui scoge Aruba como nan destino preferi pa e ultimo tres decada. The post Prome Minister Mike Eman a ricibi turistanan cu a scoge Aruba como destino pa tres decada caba appeared first on 24ora - Prome Den Noticia.