San Nicolas tin un luga di hunga atractivo p’e muchanan

Ta diferente instancia a bini hunto, tanto cu idea como e parti financiero, pa crea un luga atractivo p’e muchanan di San Nicolas. Un parke colorido y lo sigui cu mas di esakinan den otro barionan di Aruba. Diabierna den oranan di mainta a tuma luga inauguracion di e parke aki na Lago Heights Sports unda tabata presente Amy Richards, coordinado di proyecto Bario Unico di CEDE Aruba. A realisa e proyecto aki cu colaboracion di diferente partner manera Jantje Beton, Gobierno di Aruba, VNO y Fondo di Postcode Loterij. Henter e proyecto aki tabata bou guia di Arkitecto Raffy Kock. A invita e muchanan di Paulus School y Mon Plaisir pa inagura e parke CEDE Aruba ta comprometi pa crea espacio recreativo p’e muchanan. Den caso di e parke, e plan di mantencion di e parke lo ta na encargo di CEDE Aruba durnate e prome aña. Despues e mantencion lo sosode den forma sostenibel den cooperacion cu otro stakeholder pa su existencia ta pa hopi tempo. Pero e proyecto no ta cla ainda. Esey ta e prome fase di Lago Heights Park. Ta bay tin baño y fietspad p’e muchanan. Y lo sigui cu e proyecto den otro barionan. Prome lo haci evaluacion unda tin espacio adecua, y necesidad pa crea mas speeltuin p’e muchanan. Stichting Jantje Beton ta un organisacion di Hulanda cu tin e meta pa crea mas luga y oportunidadnan pa e muchanan por recrea di un forma sano. A inicia na Hulanda y a sigui cu nan proyectonan pa e area di Caribe, ora cu na 2020 nan a inicia proyecto na diferente isla Hulandes. Ta traha pa crea luganan di hunga sigu p’e muchanan. Esun na Lago Heights a bira un realidad despues di un aña y mey, debi na e diferente preparacionnan cu a haci, pa bini cu algo cu e muchanan ta mira den dje loke cu nan kier. Mester a studia e materialnan cu ta uza pa e wanta pa hopi tempo. Y el a resulta den algo hopi colorido, Miranda Verburg di Jantje Beton, a bisa durante e inauguracion. E fundacion a spera di por sigui colabora cu mas espacio di hunga p’e muchanan di Aruba y na diferente punto di e isla. Ya caba a inicia cu e pensamento pa un di dos parke, pero e localidad no ta scogi ainda. Ta spera di por sigui taha cu e partnernan cu a yuda realisa e prome parke. Hunto kier crea  mas luga di hunga p’e muchanan. Arkitecto Raffy Kock no ta un desconoci ora ta papia di diseñonan innovativo. El a recorda cu tabata casi dos aña pasa cu el a haya un yamada pa colabora den e proyecto di parke pa mucha.  E team a sinta pa cuminsa discuti riba localidad pa parkenan pa mucha. Despues e fundacion Fundacion Beton cu a mustra interes pa participa den e proyecto. The post San Nicolas tin un luga di hunga atractivo p’e muchanan appeared first on 24ora - Prome Den Noticia.