John Hart (AVP): Nos no por ignora situacion di trafico

Parlamentario di AVP, John Hart, a expresa un fuerte sentido di urgencia despues di a trata e situacion di trafico den Parlamento. E aña aki a ranca sali cu un ronda di pregunta cu e Minister di Husticia, un debate riba cambio di ley contra coremento iresponsabel y un reunion legislativo riba diabierna pa evalua e desaroyonan di siguridad den trafico. Hart a enfatisa cu e accidentenan fatal y creciente na Aruba ta rekeri un cambio di rumbo, ya cu e problemanan ta alarmantemente compleho. El a lamenta e fayecimento recien di e hoben v/d Biezen, mandando condolencia n’e famia. Entre e factornan di riesgo cu ta afecta siguridad, e parlamentario a menciona e personanan cu ta core auto bao di influencia di alcohol, e uzo iregular di telefon den man y e autonan cu glasnan getint scur di mas. Ademas, el a señala e peligernan den infrastructura, specialmente den combinacion cu e vehiculonan cu stuur man drechi. Un punto crucial cu Hart a discuti tabata e capacidad limita di Cuerpo Policial. El a subraya cu si no tin suficiente control visibel riba nos camindanan, e chauffeurnan no ta tuma e reglanan na serio. Maske el a reconoce cu gobierno ta haciendo esfuerso pa controla, el a insisti cu mester intensifica e accionnan aki. Sinembargo, e parlamentario ta consciente cu mester atende simultaneamente cu e gran reto di falta di personal den e cuerpo. Hart a conclui indicando cu Parlamento y Gobierno tin e deber di actua di un forma diferente pa frena e crisis aki urgentemente. The post John Hart (AVP): Nos no por ignora situacion di trafico appeared first on 24ora - Prome Den Noticia.