Un anochi historico naunda a obsekia e “Juf. Baly Award” pa prome biaha na e mihor graduado di Filomena College.

    Diahuebs anochi a tuma lugar e ceremonia di entregamento di diploma di Filomena College. E evento a tuma lugar na Renaissance Convention Center y durante e anochi e comision encarga cu otorgamento di e prestigioso “Juf. Baly Award” a honra e mihor graduado, Channery Dania cu e gran premio aki. E Juf. Baly Award ta un iniciativa cu a wordo elabora pa honra e legacia di Juffrouw Anuesca Natalie Baly kende tabata directora di SKOA, e Stichting Katholiek Onderwijs Aruba, durante periodo di añanan 2018 pa 2026. Relaciona cu e fayecimento di e directora di SKOA, kende durante henter su bida a dedica su mes di manera excepcional na educacion, desaroyo di hobennan y e crecemento di e fundacion di scolnan catolico, e comision encarga a bini cu e premio pa asina honra su herencia di un manera duradero y respetuoso, den forma di un distincion academico anual, consistiendo di un trofeo y un premio monetario como un homenahe permanente na su vision, dedicacion, liderazgo y obra di bida dentro di educacion catolico na Aruba. Alavez, e distincion tin como meta di stimula excelencia den educacion, motiva studiantenan y balora nan prestacion excepcional y liderazgo personal demostra den nan carera como studiante. E comision encarga consistiendo di Sr. Ron van den Brink, kende ta viudo di Juffrouw Baly, Sr. Christopher Lake, director di ASTEC N.V. como iniciador y sponsor di e premio y Sra. Jessica Irausquin, directora interino di SKOA lo honra e cinco mihor graduadonan di e cinco Scolnan MAVO cu ta resorta bou di SKOA durante e ceremonianan di entregamento di diploma durante juli 2026. Riba e potret sinta na mesa por observa e comision menciona consistiendo di Sra. Jessica Irausquin, Sr. Ron van den Brink, Sr. Christopher Lake hunto cu directora di Filomena College Sra. Raquel Lampe. Pa clausura nos ta felicita directorado y docentenan di Filomena College, tur graduado y e mihor graduado Channery Dania. Hopi exito na tur graduado den boso futuro estudio y/o carera. The post Un anochi historico naunda a obsekia e “Juf. Baly Award” pa prome biaha na e mihor graduado di Filomena College. appeared first on Aruba Native.