A pone 24 augustus pa trata caso de Meza pero dagvaarding no ta cla ainda

Den e programa di Enfoke cu Speed y Patrick, e abogado Edwin Duineveld, a revela cu finalmente, despues di presiona, a ricibi un fecha for di Ministerio Publico p’e tratamento di e caso penal contra ing. Mike de Meza. Manera ta conoci, a haci un oferta na de Meza y su casa pa yega na un areglo pa e supuesto cos contra ley cu a haya contra nan. E oferta ta cu cada un ta paga un boet di cinco mil florin y e caso no ta bay corte. Pero nan ta keda marca si di a comete algo contra ley. Esey ta algo cu ambos a nenga categoricamente. Un dia despues caba a informa Ministerio Publico cu nan ta prefera di bay corte. Segun Duineveld a splica, den e periodo di mas cu un aña cu e asunto aki a bini dilanti, causa door di DIMP y cu a pone cu de Meza no por a bira minister, ta sali na cla cu no tin nada ilegal cometi. A interoga solamente tres persona den e caso aki: Mike de Meza; Brigitte de Meza y nan accountant. Door cu OM a conclui cu tabatin “algun cos” cu no tabata cuadra, a dicidi di haci nan e oferta di paga un boet, cu a rechasa. Ademas, boet, nan ta bisa cu ta algo cu ta paga na DIMP no via di un caso penal. El a keda insisti cu mester a mira e asunto aki fiscalmente y no penalmente. Tin erornan cometi door di e accountant, kende a admiti. Y hasta e casa di Mike de Meza mester a haya placa bek. “Aparentemente tin hende no por perde cara of mester protege hende y ta bisa cu e caso mester sigui.” A haci peticion na OM pa hiba e caso mas lihe posibel pa corte.  Despues di a haci e peticion oficialmente, e team di defensa a manda pidi OM e acusacion (dagvaarding) contra de Meza. Esaki pasobra unabes cu hay’e lo bay haci un peticion na Hof pa elimina e citacion aki y pa e caso no bay corte pasobra no tin nada cu ta hustifica pa daña carera di un persona di e forma aki. OM hasta a puntra nan si nan ta desea un Regiezitting durante cual por haci peticion pa scucha testigo of haci investigacion adicional. Pero de Meza a nenga y kier bay directamente p’e caso. Despues di presion a haya informacion cu lo trata e caso dia 24 di augustus awo, pero te ainda e citacion si e team di defensa no a ricibi den nan post ainda. Y tampoco de Meza cu su casa. Ta sinti atrobe un tardansa, pasobra ya caba dos siman a pasa, siendo nan sa caba, pasobra e caso tin mas cu un aña andando. Ademas e acusacion no por ta diferente di loke a trece dilanti caba den e TOM Zitting (Cita cu Fiscal). Nan kier pa Hof dicidi si tin suficiente rason pa trata e caso, aunke cu e team di defensa di De Meza sa caba cu esaki no ta e caso. Ta sinti cu simplemente tin hende tin miedo pa de Meza bira minister. Poniendo esaki un banda, loke nan ta luchando awo ta pa caba di limpia nomber di de Meza y su casa pa nan por sigui cu nan bida. Pues asina cu haya e citacion, lo haci un peticion na Hof pa declara e dagvaarding no admisibel pa cual e caso no mester bay corte mes. Durante e programa, e hurista cu ta den e team di Mike de Meza a bisa cu nan ta cuestiona con diripiente ta bini cu algo di diesseis aña pasa, despues cu e mesun de Meza a pasa den evaluacion caba den pasado ora cu el a bira minister. Y awe Ministerio Publico ta bisa cu DIMP no tabata corecto den tur e puntonan cu nan a trece dilanti como actonan ilegal cometi. The post A pone 24 augustus pa trata caso de Meza pero dagvaarding no ta cla ainda appeared first on 24ora - Prome Den Noticia.