Fraccion di AVP no lo participa na sesion organisa pa PPA tocante HOFA

Pa medio di e comunicado aki Fraccion di AVP ta informa cu nan no lo participa na e sesion organisa pa partido PPA dia 16 di juni 2026 tocante e tema di HOFA (Houdbare Overheidsfinanciën Aruba).AVP ta reconoce cu HOFA ta un tema di gran importancia pa futuro financiero di Aruba y cu e merece un debate amplio, serio y transparente. Sinembargo, e fraccion ta considera cu un asunto cu por tin implicacionnan profundo pa gobernacion, finansas y sostenibilidad fiscal di nos pais mester ta trata den un cuadro institucional apropia, cu acceso na informacion completo y participacion di tur actor relevante.Segun Fraccion di AVP, e foro natural pa trata e tema aki ta Parlamento di Aruba, unda representantenan electo di pueblo tin e responsabilidad constitucional di evalua, cuestiona y debati e proposicionnan cu tin efecto riba futuro di nos pais. Aki ta unda parlamentarionan por haci pregunta, analisa documentonan oficial y tene gobierno responsabel pa e decisionnan cu ta propone.AVP ta enfatisa cu e discusion tocante HOFA no ta limita na consideracionnan politico so, pero ta involucra tambe aspecto legal, financiero y constitucional cu ta exigi estudio profundo y evaluacion tecnico. Entre e documentonan importante cu mester forma parti di e proceso di evaluacion ta e conseho di Raad van State.Fraccion di AVP ta considera cu participacion den un sesion organisa pa un partido politico por crea e impresion robes cu e tipo di encuentro ta substitui un debate democratico y oficial. “Nos no kier contribui na ningun percepcion cu un actividad politico-partidario por reemplasa e proceso institucional cu nos democracia parlamentario exigi. E debate oficial mester tuma luga den Parlamento, cu participacion di tur representantenan electo,” AVP a expresa.E fraccion ta reafirma cu lo sigui participa den tur discusion oficial tocante HOFA y cu lo evalua cualkier proposicion basa riba loke ta na miho interes di Aruba. The post Fraccion di AVP no lo participa na sesion organisa pa PPA tocante HOFA appeared first on 24ora - Prome Den Noticia.