Gobierno ta sigui cu su Ban Caya Bek, e biaha aki Edicion special: pa celebra diversidad cultural durante Encuentro Multicultural 2026

Gobierno di Aruba conhuntamente cu Departamento di Cultura Aruba (DCA), Comision Ban Bek Caya y diferente organisacionnan comunitario, ta invita comunidad pa participa den e 21 edicion di Encuentro Multicultural Aruba 2026, un celebracion special den marco di Dia Mundial di Diversidad Cultural pa Dialogo y Desaroyo. E evento multicultural aki, cu durante añanan a bira un simbolo di union, convivencia y respet mutuo na Aruba, lo reuni diferente comunidad y nacionalidad pa celebra e riquesa cultural cu ta caracterisa nos isla. Evento lo tuma luga diabierna 29 di mei, riba La Linda Plaza den caya Grandi, for di 6:30Pm te cu 10:30PM. E programa lo inclui un desfile y entrada di bandera, sigui cu un festival gastronomico y show multicultural cu lo presenta musica, baile folklorico y expresionnan cultural di diferente pais y comunidad. Entre e participantenan tin e Grupo Multicultural Aruba cu representacion di Aruba, Boneiro, Corsou, Caribe, Venezuela, Comunidad Wayuu, Colombia, Mexico, Filipinas, Surinam, Spaña, Portugal, Peru, Brazil, Haiti y India. Ademas di e feria culinario internacional, e publico lo por disfruta di presentacionnan cultural di agrupacionnan manera Caribbean Combo di Scol di Musica Rufo Wever, Grupo Afro Tambor Venezuela, Vallenato Premium, Alma Llanera, Alma Gitana, Gucci Dancers Aruba y diferente otro agrupacion folklorico. Tambe lo tin participacion special di artistanan invita for di Peru, fortaleciendo ainda mas e caracter internacional di e encuentro. Gobierno di Aruba ta aprecia profundamente e cooperacion entre ministerionan, institucionnan cultural, fundacionnan, medio di comunicacion y tur comunidad participante cu ta contribui pa haci posibel e edicion special aki di Encuentro Multicultural 2026. E iniciativa aki ta refleha e vision di Aruba como un sociedad multicultural, inclusivo y habri, unda dialogo, respet y intercambio cultural ta fortalece e conexion entre pueblo y comunidadnan. Tur comunidad ta cordialmente invita pa bishita, participa y celebra hunto e diversidad cultural cu Aruba tin pa ofrece. The post Gobierno ta sigui cu su Ban Caya Bek, e biaha aki Edicion special: pa celebra diversidad cultural durante Encuentro Multicultural 2026 appeared first on Aruba Native.