Minister di Educacion, sra. mr. Gerlien Croes ta valida plan pa adaptacion y ampliacion di curiculo y profesionalisacion en conexion cu enseñansa multilingual, incluso Papiamento y otro idiomanan.

  ORANJESTAD, 25 di mei 2026 – Minister di Education ta organisa consulta cu scolnan basico pa scucha idea y sugerencia di e maestronan di klas 1, 2 y 3 riba ampliacion di material educativo y training di maestro relaciona cu enseñansa multilingual. Desde 2024 a introduci cambio den curiculo den scol basico. Papiamento a bira e idioma cu e muchanan ta siña lesa y skirbi aden y ta siña Hulandes den un forma cu ta pas cu muchanan cu no ta lanta ta papia e idioma. Minister di educacion, sra. mr. Gerlien Croes a laga haci un investigacion preliminario riba e implementacion di dicho cambio pa tuma desicion riba e miho manera pa sigui cu enseñansa multilingual.  Maestronan ta indica di tin mester di mas sosten y profesionalisacion. Tin diferente punto di mehoracion pa loke ta trata curiculo y material pa scol, como tambe profesionalisacion di maestro. Ademas enseñansa den Papiamento y Hulandes no ta para los di esun di Ingles y Spaño. E dos ultimo idiomanan aki tambe tin nan funcion den siñamento di nos muchanan y mester haya nan luga den e curiculo di scol. A base di e resultadonan aki y e recomendacionnan ricibi, ministerio di educacion a traha un programa pa desaroyo di enseñansa multilingual. E accionnan describi riba tereno di curiculo y profesionalisacion ta loke minister di educacion ta laga valida durante e tres encuentronan cu veld dia 26, 27 y 28 di mei venidero. Den e forma aki Minister ta percura cu e maestronan ta haya e oportunidad di duna nan punto di bista riba e conclusionnan y e accionnan formula. Finalmente ta tur actor hunto por logra desoroyo di calidad di enseñansa pa nos muchanan. Mientras tanto, cu ayudo financiero di Hulanda, minister di educacion lo inverti den desaroyo di material teniendo na cuenta diferente punto cu a bin dilanti den e proceso aki. Segun Minister Gerlien Croes; “Nos ta traha pa un enseñansa inclusivo, pa medio di cual e muchanan ta desaroya dominio di idioma y alabes por uza e diferente idiomanan cu nan ta domina miho pa nan por siña”. The post Minister di Educacion, sra. mr. Gerlien Croes ta valida plan pa adaptacion y ampliacion di curiculo y profesionalisacion en conexion cu enseñansa multilingual, incluso Papiamento y otro idiomanan. appeared first on Aruba Native.