Lions Club ta fortalece salud comunitario cu exitoso Health Fair na San Nicolas

Hopi di residentenan di San Nicolas y area rond a probecha e oportunidad pa haci diferente chekeo medico durante e Health Fair organisa pa Lions Club na Colegio San Agustin. E actividad, cual a tuma luga di 8or di mainta te 12or di merdia, a reuni diferente organisacion y profesional di salud cu e meta di promove prevencion y bienestar den comunidad. Den un entrevista cu 24ora.com, Geraldo Figaroa, miembro di Lions Club desde 2009, a informa cu esaki ta e di dos biaha cu nan ta organisa e Health Fair na Colegio San Agustin na San Nicolas. Segun Figaroa, e iniciativa a haya un respuesta positivo di comunidad y a logra atrae un gran cantidad di persona desde tempran den mainta. Durante e actividad, aproximadamente 60 persona a presenta pa haci nan checkeo di salud. Hopi di nan a probecha pa haci varios test medico riba mesun dia, buscando pa haya un miho bista general di nan condicion di salud. E ambiente tabata uno agradable, familiar y enfoca riba bienestar di comunidad. E Health Fair a conta cu participacion di diferente instancia y organisacion medico cu a ofrece servicio y orientacion gratuito. Entre nan tabata Xavier University, Mary Joan Foundation y ABO, cual tabata participando pa prome biaha den e actividad. ABO tabata presente pa haci chekeonan relacionado cu salud di tripa y sistema digestivo. Tambe Smile Mobile a ofrece servicio dental, incluyendo chekeo, limpiesa y reparacion chikito di dentadura falso. Aruba Vision Center a participa cu examen di bista y orientacion visual, mientras cu organisacionnan manera Quota y Fepoh tambe a brinda e checkeo di oido, apoyo y informacion pa comunidad. Ademas, un doctor tabata presente durante e actividad pa orienta e participantenan tocante uzo corecto di remedi y diferente condicion medico. E variedad di servicio a permiti cu residentenan di diferente edad por haya acceso na informacion preventivo  importante y asistencia medico basico. Segun Figaroa, e meta principal di e Health Fair ta conscientisa comunidad riba importancia di cuida salud y haci e controlnan regularmente. El a destaca cu hopi persona no ta bishita doctor regularmente y actividadnan manera esaki ta yuda acerca servicio medico na pueblo. Lions Club a expresa satisfaccion cu e resultado positivo di e actividad y a confirma cu nan ta planeando pa sigui organisa evento similar den futuro. Nan a anuncia cu e siguiente Health Fair lo tuma luga dia 13 di juni 2026 na Xavier University. Durante e  siguiente siman lo comparti mas informacion relaciona cu e evento, pero e horario lo mantene mescos, di 8or di mainta te 12or di merdia. Tur e instancianan participante di e actividad actual lo bolbe participa durante e proximo Health Fair, cu e meta di sigui fortalece acceso na servicio preventivo y educacion di salud den comunidad di Aruba. The post Lions Club ta fortalece salud comunitario cu exitoso Health Fair na San Nicolas appeared first on 24ora - Prome Den Noticia.