Fundacion Chico Harms a reconoce Robert Maduro como Baluarte Cultural 2026

Cu gran emocion y orguyo, Robert Maduro a ricibi e reconocemento oficial como Baluarte Cultural 2026-2027 di Fundacion Chico Harms. E homenahe aki ta reconoce su largo trayecto y dedicacion constante na promocion y preservacion di cultura Aruba durante hopi aña. Maduro a expresa cu e nombramento ta un gran honor y algo cu ta haci’e sinti sumamente contento, despues di hopi aña participando activamente den diferente actividad y evento cultural riba isla. Segun el, e reconocemento ta un motivacion pa sigui traha pa cultura y comparti e tradicionnan cu futuro generacion. Fundacion Chico Harms no solamente a reconoce e Baluarte Cultural, sino tambe a honra e dama cu ta carga e titulo di Pilar di Cultura. Durante su declaracion, Maduro a invita henter pueblo di Aruba pa sigui apoya y participa den e diferente actividad cultural cu lo tuma luga den Centro di Bario pa comunidad. Entre e eventonan menciona tin eleccionnan di reina y princesa, e anochinan di tambu, e actividadnan di canto, e festivalnan di caya y dos parada cultural mas grandi: Parada di Lanterna y Parada Cultural di Brasil, cual nan lo tuma luga durante luna di september. “Tin hopi actividad na caminda y nos cultura ta bibo y ta briya ora nos tur ta conserva y stim’e,” Robert Maduro a expresa, enfatisando importancia di mantene e tradicionnan cultural bibo pa futuro generacion di Aruba. The post Fundacion Chico Harms a reconoce Robert Maduro como Baluarte Cultural 2026 appeared first on 24ora - Prome Den Noticia.