A comparti vision pa futuro di Aruba den Café Kockelmann

Prome Minister di Aruba, mr. Mike Eman, tabata invitado diabierna anochi den e programa politico reconoci di WNL, Café Kockelmann riba NPO 2. El a comparti su vision tocante e futuro di Aruba den Reino Hulandes y e oportunidadnan strategico pa cooperacion internacional. Durante e entrevista cu presentador Sven Kockelmann, Prome Minister Mike Eman a enfatisa cu no mester mira Reino solamente como “un herencia di pasado,” sino como un oportunidad pa crea balor nobo pa tur pais den Reino. “Nos ta convenci cu Reino mester ta mas cu un herencia di pasado. Nos mester busca unda tin balor agrega,” Prome Minister Mike Eman a expresa durante e programa transmiti riba television nacional na Hulanda. Den e contexto ey, Prome Minister a papia ampliamente tocante e dos Memorandum of Understand (MoU) firma recientemente, pues cu Wageningen University & Research (WUR) y tambe KLM, Royal Schiphol Group. Segun Eman, e meta ta pa desaroya un centro di conocemento structural na Aruba cu por contribui na sostenibilidad, restauracion di naturalesa y innovacion den agricultura. “Nos ta trahando hunto pa organiza un presencia permanente di WUR na Aruba. No solamente pa yuda Aruba den su ambicionnan di sostenibilidad y naturalesa, pero tambe pa crea un modelo cu por exporta pa region,” Eman a declara. Prome Minister a destaca cu Aruba kier amplia su economia di conocemento y crea oportunidad nobo mas leu di turismo, fortaleciendo e posicion di Aruba como un centro regional di innovacion y sostenibilidad. Un otro tema importante durante e entrevista tabata e ambicion di Aruba pa explora un sistema di preclearance europeo similar na e modelo cu Aruba tin cu Merca for di algun decada caba. Actualmente, e pasaheronan cu bula for di Aruba pa Merca ta pasa door di control di aduana y inmigracion di Merca (U.S. Customs and Border Protection) na Aruba mes. “Lo cu nos kier ta cu e mes experiencia positivo cu Aruba tin cu e “US preclearance” por wordo explora tambe den contexto Europeo,” Prome Minister a splica. Segun Eman, Aruba tin ventaha strategico p’e sistema aki, considerando cu Koninklijke Marechaussee ta caba presente riba isla. “Nos tin marechaussee na Aruba caba. Esey ta haci cu e base ta existi caba. Nos ta kere cu Aruba por bira un gateway pa Europa,” el a expresa. Durante e transmision, presentador Sven Kockelmann a dialoga cu diferente otro invitadonan importante, entre nan lider di CDA Henri Bontenbal, secretario di estado Eric van der Burg y activista Irani-Hulandes Negin Nafissi. Participacion di Prome Minister Eman den e programa a ofrece un plataforma importante pa pone Aruba den centro di dialogo politico na Den Haag y pa amplia e conversacion tocante futuro di Reino, cooperacion strategico y e papel cu Aruba por hunga den Europa y nos region. The post A comparti vision pa futuro di Aruba den Café Kockelmann appeared first on 24ora - Prome Den Noticia.