Scirbi pa Pastor Marcel Balootje: Mantene bo curason limpi

Ora un hende dicidi, di arepenti y bandona caminda di maldad, Dios ta limpia su curason, pasobra bo curason ta determina e direccion di bo bida. Si bo curason ta malo, bo no por sconde, e ta manifesta hasta den bo trabao, na bo cas, cu bo famia, den bo matrimonio, e ta stroba tur avance spiritual. Cuanto hende no ta hiba un bida religioso, pero cu un mal curason, un curason cu ta persigi, un curason cu ta rechasa, un curason cu no ta pordona, un curason cu ta drumi wak e oportunidad pa destrui e prohimo, cu no ta sosega tur ora e mira caida di su prohimo. No tin ningun trabao of ofishi na mundu cu ta obliga hende demostra e maldad cu tin den nan curason, pero ora hende tin capricho y un curason cu no kier arepenti ( Romanonan 2:5).nan curason mes ta demostra ken nan ta. Despues di a comete un pica grave, pa su mes , y cu consecuencia pa henter su famia, David a yora y roga na Dios bisando; Crea den mi un curason limpi,O Dios,y renoba un spirito recto den mi.( Salmo 51:10). Pasobra e sa cu Dios no ta gusta hende cu curason orguyoso, falso, mentiroso y malbado, pasobra nan curason no ta recto cu Dios.  Ora nos ta pidi Dios algo, Dios ta screen nos curason, e ta samina nos peticion, y si tin algo di envidia, of menosprecio, of discrimacion den dje, den cual nos ta halsa nos mes, enbes di humiya nos mes e peticion ey ta wordo poni un banda , te na momento cu nos bin dilanti di Dios den tur humildad, y Dios lo contesta nos oracion. Dios ta stima nos tur igual, Dios ta Tata pa nos tur, pesey Cristo Hesus a sinja e oracion di nos Tata, cual no ta un oracion religioso, pero ta un oracion den cual tin siete peticion, demostrando cu nos tin confiansa y ta Dios so por supli nos necesidad. No laga lugar pa duda den bo curason, aparta rabia, odio, amargura, y vengansa for di bo curason, no paga malo, cu malo, no busca pa destrui hende, no persigi bo prohimo, sino laga tur cos den man di Dios, y lo bo wak con Dios lo atende e asunto, pasobra si un hende ta papia mentira of e ta biba un bida cu no ta agrada Dios, na final di dia ta e mes tin cu duna cuenta na Dios. Tene masha cuidao ora un hende hinca den su curason pa kibra bida di otro hende, pasobra Dios ta wak e cos ey masha profundo, ora un hende kier destrui locual Dios a uni, pasobra locual tin den bo curason, no ta amor, ta envidia, mescla cu pasion diabolico. Warda bo curason riba tur cos, pasobra e ta e fuente di bida. ( Proverbionan 4:23). E bon hende for di e bon tesoro di su curason,ta saca loke ta bon, y e mal hende, for di e mal tesoro ta saca loke ta malo, pasobra for di abundancia di curason boca ta papia.( Lucas 6:45). Hende cu mal curason ta gusta hustifica nan mes, y no ta wak riba e husticia di Dios, nan ta halsa nan mes, y no ta wak interes di otro nan, palabra di Dios ta bisa cu nan ta confia den nan mes cu nan ta husto.( Lucas 18:9). Dios ta stima hende humilde, pero humildad ta proceso pa henter nos bida, pasobra bo no por ta humilde diadomingo, y dialuna bo ta arogante, cu boca sushi, esey no ta bini di Dios. Sinceramente, Pastor Marcel Balootje.  The post Scirbi pa Pastor Marcel Balootje: Mantene bo curason limpi appeared first on 24ora - Prome Den Noticia.