Ambulance Zorg ImSan a organisa “Ambulance Experience Day” pa acerca comunidad na trabou di emergencia

Cu un ambiente educativo y interactivo, Ambulance Zorg ImSan a organisa un “Ambulance Experience Day” na Renaissance Convention Center como parti di celebracion di Ambulance Week. E actividad special a atrae un gran cantidad di mucha y mayor, cu a haya oportunidad pa conoce mas di cerca e trabou importante cu personal di ambulance ta realisa diariamente den comunidad. For di oranan di mainta tabatin un fila grandi di mucha cu nan mayornan wardando pa drenta e opendag, cual a cuminsa di 9 or di mainta y a bay te cu  2 or di atardi. Durante e actividad, diferente ambulance tabata presente pa mustra comunidad con nan ta opera y cual ta e procedementonan cu personal medico di emergencia ta sigui durante diferente situacion critico. Den entrevista, Liberato Hoek, Operationeel Leider di Ambulance Zorg ImSan, a explica cu e actividad tabata enfoca principalmente riba educa e muchanan di un manera interactivo y practico. Durante e evento tabatin diferente mesa informativo unda personal di ambulancia a comparti conocemento y experiencia cu e bishitantenan. Muchanan por a mira y conoce interior di e ambulancenan, siña con e ekiponan medico ta funciona y tambe participa den e actividadnan educativo. Entre e demostracionnan tabatin un area special unda nan a siña con pa yuda stop un sangramento y un otro area dedica na CPR, unda muchanan por a practica tecnica basico di resucita dependiendo di nan edad y nivel. Tambe tabatin oportunidad p’e muchanan saca portret cu ekipo y paña di ambulance, creando un experiencia educativo pero al mes tempo divertido. Na cada mesa tabatin un tema diferente relaciona cu trabou di emergencia y e proceso cu personal di ambulancia ta sigui durante diferente tipo di incidente. Facebook live link: https://www.facebook.com/share/v/1BEcNCuDMB/ Segun Hoek, e meta principal di “Ambulance Experience Day” tabata pa acerca comunidad, specialmente e hobennan, n’e realidad di trabou di emergencia y crea mas apreciacion p’e dedicacion di personal di ambulancia den Aruba. The post Ambulance Zorg ImSan a organisa “Ambulance Experience Day” pa acerca comunidad na trabou di emergencia appeared first on 24ora - Prome Den Noticia.