St. Regis a clausura di Siman di Aprecio p’e Asociadonan

Cu diferente actividad recreativo y deportivo, The St. Regis Aruba Resort a celebra exitosamente nan “Social Appreciation Week”. U siman dedica completamente na aprecia y reconoce e esfuerso diario di nan empleadonan. Den entrevista, Terry Florez Davis, Director Human Resources Operations na St. Regis Aruba Resort, a comenta cu esaki ta nan di dos aña consecutivo cu nan ta organisa e celebracion special aki pa crea un ambiente di union, agradecimento y motivacion entre empleadonan. Davis a indica cu tur empleado a pasa un siman hopi agradabel y yen di actividad dibertido. Celebracion a cuminsa dialuna cu un festival special, unda tur trahado a ricibi un regalo y tambe por a participa den diferente wega recreativo. Durante henter e siman, hotel a organisa varios evento deportivo y recreativo p’e empleadonan, creando e oportunidadnan pa uni, diversion y comparti entre diferente departamento di e resort. Tur empleado a participa activamente den e actividadnan y por a disfruta di e momentonan special den un ambiente positivo y uni. Davis a destaca cu e meta principal di e celebracion ta pa haci e empleadonan sinti aprecia p’e dedicacion y esfuerso cu nan ta pone diariamente den nan trabou. Pa clausura e “Social Appreciation Week”, St. Regis Aruba Resort a organisa un “Crazy Bowling Night”, unda e empleadonan por a comparti y disfruta hunto mientras a competi pa diferente premio y regalo. Segun Davis, e actividad final a resulta un exito y e trahadonan a gusta hopi e sorpresa y ambiente alegre durante e anochi. The post St. Regis a clausura di Siman di Aprecio p’e Asociadonan appeared first on 24ora - Prome Den Noticia.