Dangui Oduber (MEP): Ta cuestiona gasto di mas cu 100 mil florin pa bay Hulanda

Fraccion di MEP por medio di Dangui Oduber a expresa nan disgusto cu loke ta tumando luga na Aruba na e momentonan aki den seno gubernamental. Un delegacion grandi a biaha pa Hulanda pa “fiesta” y cu ta costa caha di gobierno nada menos cu 100 mil florin. Oduber den un declaracion duna a bisa cu en total tres minister di gobierno ta na Hulanda hunto cu nan conseheronan, Perschef y Secretario di Conseho di Minister. Un biahe cu ta costa mas di 100 mil florin.Ta cuestiona e echo aki pasobra ta recientemente Premier Jetten tabata na Aruba unda cu el a sinta cu gobierno pa discuti tema y topiconan di interes. Awo e parlamentario no ta compronde pakico e urgencia di biaha pa Hulanda pa bolbe topa cu e mesun hendenan y trata e mesun temanan en comun.Mas bien e ta kere cu e delegacion grandi a bay Hulanda pa fiesta, esta introduccion di e Minister Plenipotenciario. A haci uzo di placa di pueblo pa un biahe di placer, mientras cu prijsnan ta mas halto cu nunca y pueblo no tin caminda mas pa sconde di tur e slanan di prijs. El a menciona e ultimo indicacion di Oficina di Estadistica cu ta mustra riba e necesidad pa un famia sobrevivi cu ta riba 5 mil florin.El a cuestiona e prioridadnan robes di e gobierno cu ta gasta un suma di mas cu 100 mil florin en bes di atende cu e problemanan y e dolornan di pueblo. A gasta asina hopi placa pa un biahe cu no solamente no tabata necesario, no tabata urgente y no tin un proposito. Riba dje, no a informa parlamento di nan biahe y “niun dia nos a ricibi un agenda di kico exactamente nan ta bay haci, fuera di fiesta y luha cu placa di pueblo. Esaki ta un gobierno cu ta manipula y gaña pueblo, y un gobierno cu ta goberna e pais aki cu prioridadnan robes.” The post Dangui Oduber (MEP): Ta cuestiona gasto di mas cu 100 mil florin pa bay Hulanda appeared first on 24ora - Prome Den Noticia.