Minister Wendrick Cicilia: A informa parlamento riba desaroyo di salario minimo pa hoben

Departamento di Labor y Departamento di Progreso Laboral ta dos herment importante den Economia di pais Aruba. Y ta importante cu e dos departamentonan aki ta bon sincronisa cu e maneho economico. Den cuadro di esaki Minister di Labor mr. Wendrick Cicilia tabata presente den un reunion di comision fiho di labor di Parlamento pa duna informacion riba cambionan haci pa logra mas eficiencia. Den un aña cu e mandatario tin e departamento aki bou di su encargo, a tuma diferente iniciativa pa optimalisa y profesionalisa ambos departamento. A papia di e “doorlichtingsrapport” y un proceso di evaluacion den cual a envolvi empleado di ambos departamento. A comparti cu parlamento e conclusion pa ricibi conseho riba e siguiente cambionan cu kier introduci. “E proceso ta andando. No tin ningun motibo di preocupacion. Nos kier p’e departamentonan funciona eficientemente. Un di e iniciativanan cu a tuma ta e Tienda Legal Laboral, cu ta activo. E ta un di e cambionan positivo y a informa parlamento di dje.” Otro aspecto cu a bini dilanti ta e desaroyo di salario minimo den sector priva y salario minimo pa hobennan. Un di e parlamentarionan, Shailiny Tromp-Lee a pidi mas informacion riba esun di salario minimo pa hoben, relaciona cu e mocion pasa den parlamento dia 1 di september 2025 di forma unanime. E mandatario a splica cu despues di e mocion ey, a cuminsa traha di biaha riba e deseo aki. Pero como cu e ta algo completamente nobo na Aruba, e ta tuma mas tempo. Ya caba a ricibi conseho di Sociaal Economische Raad (SER). Esaki tabata motibo pa pospone ehecucion di e mocion un rato pa studia tur loke cu SER a pone den nan rapport. Ora di tuma un decision, mester hacie di forma responsabel. A duna e parlamentario un relato den ki fase ta cu e tema di salario minimo pa hoben y kico falta. Aruba ta un pais prospero y mester comparti e prosperidad aki cu e ciudadanonan di Aruba. Tin crecemento y cifranan tambe ta positivo. Pero desaroyo di salario si a keda atras. “Parti clave di Gabinete AVP FUTURO y maneho di labor ta percura pa e salarionan sigui desaroya.” Den cuadro ey a duna un splicacion na e comision kico tabata e conseho di SER riba e proceso cu mester hiba pa acopla e salario minimo na “bestaandsminimum” (e minimo cu un persona mester di entrada pa e cubri su necesidadnan basico). E intencion di gobierno ta pa subi e salario minimo den fase te ora cu yega na e suma cu un hende por biba di un forma decente. A duna un “briefing” tecnico di e conseho. E mandatario a sinti cu e reunion a bay den bon ambiente y el a ricibi varios punto di bista / critica cu contenido. “Nos ta contento pa e harmonia durante e reunion aki.” The post Minister Wendrick Cicilia: A informa parlamento riba desaroyo di salario minimo pa hoben appeared first on 24ora - Prome Den Noticia.