Dangui Oduber (MEP): Jet cu Minister Croes a uza no por cobra pa pasashi

MEP no ta laga e asunto muri. Nan kier claridad riba e biahe cu minister Gerlien Croes a realisa aña pasa abordo di un jet priva Mericano. Incluso a busca conseho legal na Merca y Rocco Tjon di MEP tabatin un audiencia cu gobernador y a entrega esaki. Tabata aña pasa november cu Minister Gerlien Croes a biaha pa Corsou. El a haci esaki abordo di un jet priva. Pero no a duna informacion di esaki na parlamento. Algo cu MEP ta cuestiona fuertemente y a indaga pasobra nan ta haya necesario pa e mandatario duna claridad. Esaki den cuadro di integridad den gobernacion. Dangui Oduber den combersacion cu 24ora a duna di conoce cu Rocco Tjon a entrega e opinion legal cu MEP a busca relaciona cu e uzo di jet priva door di minister Gerlien Croes. E relato ta di un experto di aviacion Mericano.E discusion aki ta andando for di 19 di november 2025 y “te awe nos no por haya claridad y transparencia con minister Gerlien lo a paga su biahe, of ken a paga.” E informacion cu nan a ricibi for di e mandatario ta cu e mes a paga. Esaki ta loke nan ta cuestiona, pasobra e no ta un biahe priva pero di trabou. Den un caso asina, segun Oduber, Parlamento tin e deber pa controla esaki. Aña pasa a puntra Minister di Transporte mr. Wendrick Cicilia si e jet priva uza door di su colega tin certificacion y licencia pa cobra pasahero. A base di esey a busca e conseho legal. E resultado ta cu e minister no por paga un operador cu no tin certificacion y licencia. “E ta complica e asunto mas pa minister Gerlien Croes. Un avion cu no tin licencia of certificacion, no por cobra y si e haci esey, e ta viola leynan Mericano.” Oduber a agrega cu e di dos opinion legal di abogadonan local ta bisa cu e mesun regla ey ta conta na Aruba tambe. MEP no por compronde e ora con e minister ta bisa cu el a paga. “No solamente a manipula y gaña nos. No tin transparencia y no tin respet pa Parlamento. Minister Gerlien Croes kier obstaculisa e trabou di parlamento door di su silencio. E tin un actitud arogante y ta parce cu transparencia a bira su enemigo. Segun mi, e minister ta den problemanan hopi mas serio cu e dos opinionnan cu nos a ricibi.” MEP lo comparti cu Parlamento di Aruba e dos opinionnan legal cu nan a busca, pasobra falta di transparencia ta algo hopi serio. Awo cu e documentonan aki, gobernador tambe lo pidi Presidente di Parlamento pa sigui cu e reunion posponi “tot nader order”.  E mandatario, Oduber a bisa, tin e deber pa contesta pueblo. The post Dangui Oduber (MEP): Jet cu Minister Croes a uza no por cobra pa pasashi appeared first on 24ora - Prome Den Noticia.