Grupo di Teatro Senguene a presenta nan obra na diferente scol

Despues di tres dia exitoso di presentacion na varios scol, Cas di Cultura y Grupo di Teatro Senguene ta celebra orguyosamente e impacto continuo di e Little Stars Theater Festival y e produccion pa mucha di e aña aki, Hans y Gretita. Prome cu e presentacion final di e festival cu lo tuma luga den weekend, e studiantenan di e scolnan participante St. Paulus School, Colegio Santa Filomena Basis y Scol Soeur Juliette a tuma parti den un “Tour di Little Stars”, treciendo e magia di theater directamente n’e scolnan basico rond Aruba. Riba 18, 19 y 20 di mei, cada scol participante a presenta no solamente pa nan skol, pero tambe pa studiantenan di diferente scol basico, creando un intercambio unico centralisa rond di creatividad, contamento di historia y expresion hubenil. E miembronan jong di e elenco tabatin e oportunidad di presenta p’e studiantenan di St. Paulus School, Colegio Santa Filomena Basis, Scol Soeur Juliette, Scol Caiquetio, Colegio Sagrada Curazon, Colegio Santa Teresita, Mon Plaisir San Nicolas, Reina Beatrix School y Pius X School. E iniciativa a resulta di ta un exito grandi, unda cu hopi mucha a experencia theater bibo na un manera atractivo y accesibel. Fuera di entretenimento, e proyecto tabatin como meta pa curasha confiansa, teamwork, habilidad di comunicacion, y un aprecio creciente pa e arte di actuacion den e hobennan di Aruba. Pa medio di programanan manera e Little Stars Theater Festival, Cas di Cultura, y Grupo di Teatro Senguene ta sigui cu nan mision di sembra amor pa teater — inspirando un generacion nobo pa conecta cu cultura y creatividad a traves di e poder transformativo di theater. Ta curasha publico pa sigui Cas di Cultura y Grupo di Teatro Senguene riba medionan social pa mas informacion tocante e evento final y actividadnan cultural venidero. The post Grupo di Teatro Senguene a presenta nan obra na diferente scol appeared first on 24ora - Prome Den Noticia.