Santa Rosa: Introduccion di carnet t’un esfuerso continuo pa fortalece agricultura

Diamars mainta, Minister Geoffrey Wever, kende ta encarga cu asunto nan Economico, Finansa y Sector Primario den nomber di Gobierno di Aruba, a anuncia e introduccion oficial di un carnet pa e productornan local cu ta comercialmente activo den Sector Primario. Un paso importante den e esfuersonan continuo pa fortalece agricultura local den un forma mas eficiente, stimulando asina produccion nacional y promoviendo sostenibilidad alimentario na Aruba. E carnet nobo aki lo sirbi como un reconocemento oficial di productor comercial y lo facilita e identificacion entre agricultor, criadonan, piscado, y apicultor como nos emprendedornan den e Sector Primario. Cu e carnet, productornan local lo por beneficia di e incentivo fiscal sin mester cada biaha haci un peticion pa carta di Santa Rosa. Esaki lo conduci den menos burocracia y mas eficiencia. Esaki ta simplifica e proceso y sigura cu e proceso di importacion di e productonan liber di impuesto ta bay di un manera mas lihe. Tene na cuenta si, cu e mester ta producto y/of materialnan cu ta pa specificamente pa Sector Primario, di acuerdo cu e ley di Douane, kende nan ta responsabel tambe pa haci e control di e diferente producto nan importa. Na e ocasion aki Minister Geoffrey Wever a hiba palabra y ta sumamente satisfecho cu e trabou haci entre e Departamento di Agricultura, Cria y Pesca-Santa Rosa pa medio di Nathalie Maduro conhuntamente cu Departamento di Aduana Aruba cu e cooperacion di mr. Roderick Croes. Nathalie Maduro a splica un poco di e procedura, caminda cu cada productor mester ta inscribi na Santa Rosa. Kico esaki ta rekeri, pa trece tur informacion preto riba blanco manera entre otro, papel di tereno, ID valido, un situatie plan di e tereno y un registro di Camara di Comercio valido y asina yega na remarca pa por haya e carnet. Di parti di Departamento di Aduana Aruba mr. Roderick Croes pa splica e proceso di pone tur informacion di e productor local den e sistema digital “Asecuda” pa asina por yega na remarca pa impuesto liber ariba e diferente producto of material pa nan produccion. Esaki sigur lo haci e trayecto mas facil y eficiente. Despues di introduccion y aplicacion a haci entrega di e prome carnet na Kendrick Balentin di “Keda Botanicals” pa medio di Minister Geoffrey Wever. Riba e carnet ta aparece potret nomber di e productor y su compania. Sigui pa un number di oficial di registro y cu un codigo cual ta señala den cual di e 4 sector nan e ta activo. Palabra di gratitud y felicitacion Kendrick Balentin como e prome productor local cu ta ricibi e carnet cu e number LB 001/2026. Tambe na Minister Geoffrey Wever, Nathalie Maduro di DLVV-Santa Rosa y mr. Roderick Croes pa e bon cooperacion ricibi pa por a logra esaki pa tur nos productor nan comercial cu ta forma parti di nos Sector Primario di Aruba. The post Santa Rosa: Introduccion di carnet t’un esfuerso continuo pa fortalece agricultura appeared first on 24ora - Prome Den Noticia.