Fraccion di AVP: Iniciativa di documenta beyesa natural di Caribe Hulandes ta aumenta conocemento

Miembronan di fraccion AVP, Jennifer Arends-Reyes y Dennerich Kelly a participa den e estreno exclusivo di “The Six – Discovering Dutch Caribbean Nature”, un documental inspirador cu ta pone den spotlight e rikesa natural extraordinario di e seis islanan di Caribe Hulandes y e relacion profundo cu ta existi entre hende, cultura y medio ambiente. E produccion audiovisual, realisa bou di e plataforma WOW!, ta hiba espectadornan riba un biahe unico door di Aruba, Boneiro, Corsou, Saba, Sint Eustatius y Sint Maarten. A traves di e imagennan impresionante y naracion cautivante, e documental ta mustra no solamente e beyesa natural cu caracterisa cada isla, pero tambe e importancia di conserva y proteha e ecosistemanan cu ta forma parti integral di nos identidad como pueblo. Segun Fraccion AVP, e documental ta yega na un momento importante, unda conscientisacion ambiental y sostenibilidad ta bira cada dia mas relevante pa nos region. E mensahe central di e produccion ta cla: e islanan di Caribe Hulandes no ta solamente destinacionnan turistico aprecia pa miles di bishitante cada aña, sino tambe hogar di ecosistemanan unico cu merece cuido, respet y proteccion pa garantisa nan sobrevivencia pa generacion futuro. Fraccion AVP ta considera cu proyectonan manera “The Six – Discovering Dutch Caribbean Nature” ta confirma e poder cu educacion, ciencia y storytelling tin ora cu nan ta combina cu un proposito comun. Door di conta e historia di nos naturalesa den un forma accesibel y atractivo, e documental ta contribui na aumenta conocemento, crea mas aprecio pa nos patrimonio natural y motiva ciudadanonan pa asumi un rol activo den conservacion di medio ambiente. “Nos ta kere cu proteccion di naturaleza no ta solamente responsabilidad di gobernantenan of organisacionnan ambiental, sino di tur miembro di comunidad. Documentalnan manera esaki ta yuda nos compronde miho e tesoronan natural cu nos tin y e responsabilidad comparti cu ta bin cu ne”, asina lider di fraccion, Jennifer Arends-Reyes a expresa. Ademas di resalta e balor educativo di e proyecto, AVP a felicita e ekipo di produccion, investigadonan, partnernan institucional y tur boluntario y colaborado cu a aporta na realisacion di e documental. Segun e fraccion, e resultado final ta evidencia di loke por logra ora talento, conocemento cientifico y amor pa nos region ta bini hunto. Fraccion AVP ta desea “The Six – Discovering Dutch Caribbean Nature” hopi exito durante su recorido y distribuimento, y ta spera cu e produccion lo inspira mas hende, tanto local como internacionalmente, pa aprecia, respeta y proteha e patrimonio natural incomparabel di Caribe Hulandes. E fraccion ta reafirma su compromiso cu iniciativanan cu ta promove sostenibilidad, educacion ambiental y preservacion di nos recurso natural pa bienestar di generacionnan actual y futuro. The post Fraccion di AVP: Iniciativa di documenta beyesa natural di Caribe Hulandes ta aumenta conocemento appeared first on 24ora - Prome Den Noticia.