E tin impacto directo pa Aruba: Ta importante pa monitor situacion den Venezuela

Na Den Haag Gobierno di Aruba a reuni cu e Minister di Relacionnan Exterior, Tom Berendsen. E encuentro tabatin como enfoke riba cooperacion den Reino, desaroyo strategico y e situacion geopolitico den region. Durante e reunion, Prome Minister di Aruba, Mike Eman, a expresa su gradicimento p’e envolvimento y solidaridad cu Reino Hulandes a mustra durante e reciente tension den region cerca di Venezuela. Den e reunion, e delegacionnan a papia ampliamente tocante e desaroyonan den region y e importancia di sigui monitor e situacion den Venezuela, teniendo cuenta e impacto directo cu e tin riba Aruba, e otro pais- y islanan den Reino. Gobierno di Hulanda a confirma cu tin contacto continuo cu e representantenan diplomatico den Caracas y cu Reino ta sigui observa e situacion cuidadosamente pa proteha e interesnan comparti di Reino Hulandes. Prome Minister Mike Eman a enfatisa cu durante e periodo di tension, Aruba a sinti claramente e apoyo di Reino. El a indica cu e momentonan aki a demostra den practica e balor y importancia di e relacionnan constitucional den Reino, specialmente den area di relacionnan exterior y siguridad. Segun e Prome Minister, e cooperacion durante e crisis a confirma cu Reino ta comparti responsabilidad pa stabilidad y siguridad den region. Ademas, durante e encuentro tambe a trata diferente oportunidad strategico pa Aruba. Entre otro, a discuti e MoU’s (Memorandum of Understanding) cu recientemente firma cu e partnernan internacional manera KLM, Schiphol y Wageningen University & Research (WUR). E iniciativanan aki ta enfoca riba desaroyo economico, fortalece e conexion internacional y cooperacion den area di sostenibilidad, conocemento y innovacion. Tambe a intercambia pensamento tocante e proyecto di EU preclearance cu por representa un paso importante den fortalece e posicion strategico di Aruba como hub internacional den region Caribe. Minister Tom Berendsen a expresa su interes pa bishita Aruba den futuro cercano. El a destaca cu e relacion cu e pais- y islanan den Reino ta importante y cu ta existi gran interes den sigui fortalece cooperacion mutuo. Gobierno di Aruba ta mira cu satisfaccion e creciente interes y envolvimento for di Hulanda den e potencial strategico di Aruba y den e vision comparti pa duna Reino un significado nobo y relevante pa futuro. Segun Prome Minister Mike Eman, e cooperacion- y aliansanan cu ta construi actualmente ta muestra cu Reino por evoluciona no solamente como un relacion historico, sino tambe como un plataforma moderno di colaboracion, innovacion y beneficio mutuo. The post E tin impacto directo pa Aruba: Ta importante pa monitor situacion den Venezuela appeared first on 24ora - Prome Den Noticia.