Marlon Sneek: “Tweede Kamer ta vota riba Rijkswet y no Parlamento di Aruba”

Durante nos entrevista cu presidente di parlamento Marlon Sneek nos a puntr’e tocante e rijkswet HOFA cu ta dunando hopi di papia ultimo tempo den nos comunidad. Sneek a indica cu rijkswet HOFA ta un proceso legislativo cu lo sosode tanto na Hulanda como Aruba. Na Hulanda, Tweede Kamer ta esun encarga pa vota riba e rijkswet HOFA y na Aruba ta parlamento esun encarga riba e landsverordening di e ley di reino aki. E ley di Reino HOFA ta un asina yama ‘consensusley di Reino.’ Esaki ta nifica cu e ta prolonga pa medio di cooperacion y palabracion estrecho entre e gobierno- y Parlamentonan di Aruba y Hulanda. E ley ta surgi for di e acuerdonan administrativo haci durante e crisis di coronavirus, ora cu Aruba a hay’e obliga di tuma prestamonan grandi for di Hulanda. Door di a tene su mes na e reglanan financiero y economico estricto pero sostenibel aki, Aruba ta spaar riba gastonan di interes, por sigui inverti den forma sostenibel den su propio economia, y por atrae prestamonan na interes (Hulandes) mas faborabel. Sinembargo no ta tur hende ta na fabor di e ley aki pues oposicion den parlamento di Aruba ta rechasa e ley aki expresando cu esaki lo mina e autonomia cu Aruba tanto a bringa p’e. Aceptando un ley asina Hulanda lo tin mas control riba Aruba. E sindicatonan tambe a expresa na varios ocasion di no ta di acuerdo cu e ley aki. Mientras tanto Aruba ta wardando riba conseho di Raad van Advies riba e landsverordening y na Hulanda, Raad van Staten mester saca su conseho ainda riba e rijskwet HOFA. Sneek a sigura cu ora e consehonan sali sigur debatenan lo tuma luga den sala di parlamento di Aruba. The post Marlon Sneek: “Tweede Kamer ta vota riba Rijkswet y no Parlamento di Aruba” appeared first on 24ora - Prome Den Noticia.