DVG ta monitor desaroyonan internacional relaciona cu Ebola

Directie Volksgezondheid (DVG) kier informa comunidad cu nos ta monitor activamente e desaroyonan internacional relaciona cu e brote di Ebola actualmente na Republica Democratico di Congo (Africa) y Uganda, despues cu recientemente World Health Organization (WHO) a declara e situacion como un emergencia di salud publico di importancia internacional (na Ingles: “Public Health Emergency of International Concern” (PHEIC)). Un declaracion di “Emergencia di Salud Publico di importancia internacional” ta wordo haci ora un brote tin potencial pa afecta varios pais y ta rekeri coordinacion internacional pa limita propagacion di e malesa y proteha salud publico mundial. Ebola (Bundibugyo virus) ta un malesa viral hemoragico severo y hopi biaha fatal. E ta un malesa zoonotico cu ta wordo transmiti di animal pa hende. Infeccion humano ta sosode ora di contacto directo cu sanger of fluido corporal di un persona of animal infecta. Na Aruba no tin ningun caso di Ebola registra ni raporta y no tin indicacion di un menasa directo pa comunidad local. Sin embargo, DVG ta sigui evalua cualkier posibel riesgo pa Aruba y ta mantene contacto cu partnernan regional y internacional pa permanece informa riba tur desaroyo relevante. DVG ta recorda comunidad pa sigui solamente canalnan oficial di informacion manera Directie Volksgezondheid y World Health Organization (WHO), pa evita malinformacion y preocupacion innecesario. Si situacion internacional cambia of si tin informacion relevante pa Aruba, DVG lo informa comunidad debidamente. The post DVG ta monitor desaroyonan internacional relaciona cu Ebola appeared first on 24ora - Prome Den Noticia.