Scarsedad di cas no ta causa pa existencia di AIRBnB

Continuamente por scucha cu tin scarsedad di cas na Aruba. Y na mas cu un ocasion ta bisa cu e casnan cu ta uza pa huur cu bishitantenan ta causa e problema aki. Esaki ta ponencia cu Fito Croes, director di Cas Bon Group, ta bisa cu ta cuadra. Tin mas cu un aspecto cu ta hunga un rol den e escasez di cas aki na Aruba, y existencia di AIRBnB no ta un di e causanan. Ta papia di casnan pagabel cu ta scars riba e isla y e causa ta casnan AIRBnB. E no ta completamente corecto, pero si e por bisa cu e sector aki tin efecto riba e prijsnan den mercado pa cas.   Croes a duna un analisis di e situacion existente den cifras. Casnan cu ta uza pa AIRBnB ta rond di 2 mil, den e 40 mil casnan cu tin na Aruba. Si sali di e punto cu mita di e cantidad aki ta dirigi riba mercado internacional, manera Gold Coast,  e ora e 2 mil casnan ey ta representa menos cu 5% di e total di 40 mil cas. E no ta kere cu 3% tin un impacto asina grandi riba e sector di vivienda pa localnan na Aruba. Un di e principal motibonan cu e problema di vivienda pagabel aki na Aruba ta pasobra tin un demanda cu ta hopi mas grandi cu e oferta. Historicamente, of tradicion, ta cu e Rubiano ta bay na DIP pa busca un pida tereno pa construi un cas. E custumber di e Rubiano no ta pa cumpra cas cla caba. Pero e problema den e ultimo decada ta cu gobierno mes (DIP) no a crea of pone mucho tereno disponibel riba mercado. Entre otro door di investigacionnan, masha poco tereno a duna na erfpacht. E otro problema ta cu introduccion di ROPV a trece cu ne cu a privatisa un parti grandi di tereno cu a bira “groen gebied” (naturalesa protegi). Den e areanan aki no ta permiti traha cas. Un otro problema tabata cu areanan grandi priva den Santa Cruz, a destina esaki como di pais Aruba. El a nifica cu ora di verkaveling, mester hacie den reparticion di 700 pa 1000m2 pa cada parcela. Y esaki, segun Fito Croes, no ta algo na alcance di mayoria di e mercado. E alcance averahe di mayoria ciudadano ta casnan cu bal entre 260 y 270 mil florin. Tambe mester tene cuenta cu en general prijs di construccion na Aruba a subi drasticamente. El a ilustra cu p.e. BBO a trece placa den caha di gobierno, pero pa sector priva (comecial) tur prijsnan a subi. Prijsnan di productonan pa construccion a subi grandemente y esey ta keda refleha tambe den e prijs di un cas cla riba mercado. The post Scarsedad di cas no ta causa pa existencia di AIRBnB appeared first on 24ora - Prome Den Noticia.