Grupo grandi di supervisor a logra certificacion den tayer ofreci pa AHATA

Aruba Hotel & Tourism Association a certifica un grupo grandi di supervisor y manager cu a completa tayer exclusivo ofreci pa AHATA den colaboracion cu Caribbean Hotel & Tourism Association Education Foundation (CHTAEF). Supervisor di restaurant, hotel, timeshare, seguro, retail, vacation rental y tours a participa den entrenamento interactivo y practico pa eleva nan habilidad di balansa nan autoridad y motivacion cu empleado. Durante e ceremonia di certificacion a honra e exito di e participantenan den e tayer “Own Your Supervisory Authority Responsibly”, un programa enfoca riba empodera lidernan pa ehecuta nan rol di supervision y liderazgo na un manera responsabel y efectivo. E ceremonia di certificacion a habri cu palabranan di Tisa LaSorte, Presidente & CEO di AHATA, kende a expresa cu e ta sumamente impresiona cu e compromiso di cada participante cu a acepta e responsabilidad di supervision y pa crece den nan carera.  E graduadonan ta uni na un grupo di mas cu 450 persona cu a gradua di e curso anteriormente.  Su Excelencia mr. Wendrick C. Cicilia, Minister di Turismo, Transporte y Labor di Aruba, tambe a dirigi un discurso motivacional na tur participante y invitadonan presente. Den su mensahe, e Minister a gradici AHATA pa e inversion den desaroyo profesional di esnan cu ta tuma liderazgo den nos industria di turismo. Louise John y Suzanne Shillingford-Brooks, instructornan di CHTAEF a compaña LaSorte pa entrega e certificadonan den un atmosfera di aprecio y celebracion. E anochi a conclui cu un recepcion unda e participante- y invitadonan por a sigui celebra, conecta y intercambia experiencia cu otro. Durante e evento tabata evidente cu supervisornan di diferente compania a disfruta di e oportunidad pa conoce otro y siña for di experiencia di cada uno. E exito di e tayernan representa un otro logro importante pa AHATA, reflehando nan vision y compromiso continuo pa promove un turismo responsabel cu ta enfatisa calidad y pa yuda Aruba su forsa laboral desaroya nan carera.  AHATA ta gradici Eagle Aruba Resort y La Cabana Beach Resort pa nan valioso aporte na e programa den alianza cu CHTAEF.  The post Grupo grandi di supervisor a logra certificacion den tayer ofreci pa AHATA appeared first on 24ora - Prome Den Noticia.