WOW Aruba ta invita Aruba pa ‘Lead Your Legacy’

Dia 30 di mei, WOW Aruba ta organisando su di cuater conferencia, ‘Lead Your Legacy’. Na aña 2019, WOW Aruba a organisa su prome conferencia titula ‘Dare to Be’.  Na 2022 a organisa ‘Becoming a Braver You’ y na 2024 a organisa ‘The Power Within’. Cada un di e conferencianan aki a trece perspectivanan nobo y inspiracion pa participantenan y e edicion di 2026 no lo ta un excepcion. ‘Lead Your Legacy’ lo tin 4 diferente orador, cada un lo duna atencion riba un diferente pilar di liderazgo; lidera cu vision, lidera cu disciplina, lidera cu curashi y lidera cu creatividad. Corina Curatola lo ta encarga cu e pilar di lidera cu vision. Corina ta un orador internacional y coach transformacional cu ta enfoca riba liderazgo personal, autenticidad y identidad. Corina ta yuda personanan clarifica nan proposito y alinea accionnan diario cu un vision intencional di futuro. Encarga cu e pilar di lidera cu disciplina lo ta Dr. Jasmira Wiersma. Dr. Wiersma ta un economista cu un PhD, treciendo un mescla entre e mundo academico y aplicacion strategico den bida real, enfocando riba crecemento sostenibel y empoderamento financiero. Dr. Wiersma su experticiota traduci data economico compleho den habitonan practico, enfatisando con disciplina y decision a base di informacion por crea impacto riba termino largo. E pilar di lidera cu curashi lo ta bou di encargo di Kimberly Maduro. Kimberly to a fundadora di Self Love Movement y ta un specialista den resiliencia emocional. Su experticio ta empodera individuonan pa cura nan creencianan limitativo y haya nan forsa interno pa supera miedo. Kimberly lo enfoca riba confiansa, vulnerabilidad y kibra bareranan di duda. Tarrick Ras, e MC carismatico conoci pa su presencia humoristico y un trayectoria personal admirable lo ta encarga di lidera cu creatividad. Tarrick lo conta participantenan con pa wak mas leu cu e momento aki y con pa crea posibilidadnan nobo. E lo enfoca riba e importancia di “own the room” uzando creatividad pa influencia otronan intencionalmente. Alabes, e conferencia lo tin dos MC cu lo host e evento Nurianne Vd Griend – Arias y Myrienne Figaroa y tambe lo habri e atardi aki cu WATRA. Segun Giancarla Lobbrecht, president di WOW Aruba, “E conferencia aki ta representa transicion, crecemento y un profundo reconocemento propio. E ta representa e manera con bo ta lidera bo bida. Un momento dificil no ta defini bo, ni ta limita ken bo por bira”. Mientras WOW Aruba ta un organisacion di hende muhe, e conferencia aki ta pa tur hende ya cu lidera nos bida cu vision, disciplina, curashi y creatividad ta algo cu nos tur por siña di dje. Tickets ta disponibel riba pay.aw Pa mas informacion por comunica directamente cu WOW Aruba via facebook: https://www.facebook.com/wowaruba/ of por manda un email na [email protected] Organisacion WOW Aruba kier extende palabra di agradecimento na tur sponsor cu ta haciendo e evento aki posibel incluso SETAR, Aruba Airport Authority (AAA), Aruba Hotel and Tourism Association (AHATA),Aruba Tourism Authority (ATA) y Super Food Plaza.  Alabes un danki special na e colaboracion cu Renaissance, Elite Productions and Entertainment y mas. The post WOW Aruba ta invita Aruba pa ‘Lead Your Legacy’ appeared first on 24ora - Prome Den Noticia.