Reina Beatrix School y Juliana School pronto na turno Gobierno ta inicia restauracion di Willem de III Toren como parti di preservacion di patrimonio nacional

  Den un paso significativo pa preserva herencia historico di Aruba, Gobierno a anuncia oficialmente e inicio di restauracion di e iconico Willem de III Toren. Durante e anuncio, Prome Minister Mike Eman a enfatisa e importancia di e compleho historico aki, señalando cu Fort Zoutman y e toren ta forma hunto un simbolo fundamental di historia di isla. “Aunque hopi hende ta mira esaki como un solo structura, e fort tabata construi prome, y despues e toren a wordo agrega como parti integral di e compleho,” e Prome Minister a splica. Fort Zoutman, e edificio mas antiguo di Aruba, a hunga un rol central den desaroyo di gobierno di nos isla, sirbiendo den su momento como sede pa diferente funcionnan gubernamental, incluyendo aduana, inmigracion y hasta actividad parlamentario. Segun e Prome Minister, e restauracion lo wordo ehecuta cu respet total pa e balor historico di e edificio, uzando material original, colornan autentico y diseño fiel na su estado original. “Preservacion di patrimonio no ta simplemente renoba un edificio, pero mantene bibo e historia y identidad di nos pueblo,” Eman a indica. E proyecto lo wordo ehecuta den diferente fase. Inicialmente, e trabou lo enfoca riba mantencion completo di e toren, cu lo tuma algun luna, sigui pa restauracion di murayanan y structuranan rond di e compleho. E iniciativa aki ta forma parti di un plan mas amplio pa restaura y preserva monumentonan importante riba nos isla, incluyendo proyecto futuro manera Beatrix School y posibel reconocemento di Juliana School como monumento. Gobierno a destaca e rol esencial di Monumentenbureau Aruba, kende cu su conocemento y experticio ta guia e proceso pa sigura cu e autenticidad historico di e sitio ta wordo conserva. Ademas, e proyecto ta crea oportunidad pa participacion di companianan local, fortaleciendo inversion y actividad economico den sector di restauracion. Cu e inicio di e restauracion aki, Gobierno ta reafirma su compromiso pa proteha patrimonio cultural di Aruba, sigurando cu historia di nos isla ta keda preserva pa generacionnan futuro.   The post Reina Beatrix School y Juliana School pronto na turno Gobierno ta inicia restauracion di Willem de III Toren como parti di preservacion di patrimonio nacional appeared first on Aruba Native.