Reaccion riba e “Olifanti ros den cashi”di Sr. Jacco Vroegop.

  E olifante roos cu Sr. Jacco Vroegop , CEO di Horacio Oduber Hospital, ta referi na dje a  wordo extensivamente discuti.  Su ponencia ta cu ImSan mester resorta bou di manejo di Horacio Oduber Hospital, paso  mane cu e ta awor ta ocasiona cu e cuido pa pashent nan no ta optimal. E ta wordo treci manera cu lo tin un gran problema cu nunca a wordo discuti y cu ta obvio  “olifanti roos den cashi”.  E organisacion di e cuido di salud na Aruba ya tabata tema di debate político. Na Maart  2022 Parlamento a expresa su mes claramente i di forma unanime: ningun fusion entre  Horacio Oduber Hospital y Instituto Medico San Nicolas pero si colaboración intensivo  entre e dos institutonan di salud.  Esaki ta un un decicon democrático di nos parlamento di Aruba cu ta representa henter e  pueblo di Aruba. Pretende cu e escogencia aki ainda mester wordo hasi, no ta progreso , ta  ignora loke ya a wordo determina y francamente un falta di respet pa nos parlamento di  Aruba.  Den e ponencia di Sr. Vroegop e ta crea un imagen di urgencia y cu sin fusion lo surgi un  gran problema. E forma aki di presenta un ponencia ta pone presion riba tumamento di  decicion pura y ta guia e debate den un solo direccion.  Pero den cuido di salud, mester analisa e ponencianan cu transparencia y cu informacion  correcto y no crea miedo ni presion.  Otro ponencia di Sr. Vroegop ta cu Aruba tin un hospital so cu ta Horacio Oduber Hospital  y cu ImSan segun e na Hulanda lo wordo considera un focus kliniek of un ZBC( zelfstandig  behandelcentrum). Na Aruba pa ley ImSan ta un hospital. Conclusion, Aruba tin dos  hospital.  Comparacion cu Hulanda no ta aplicabel den e contexto aki Aruba tin su propio marco  legal, y esaki mester wordo respeta.  Den su ponencia tambe Sr. Vroegop ta sugeri cu mester scoge pa un “sistema nobo di  cuido di salud ” den luga di nombra un director nobo pa ImSan. Esaki ta un manera di pensa preocupante. Husto den un periodo caminda ImSan a sufri un  gran perdida cu fayecimento di director Dr. Joel Rajnherc, d.f.m.,ta esencial pa garantisa  stabilidad y continiudad den liderazgo.  No yena e posicion aki ta crea incertidumbre den e organisacion y pone den peliger e  progreso di desaroyonan actual. Un institucion di cuido di salud cu ta funciona bon  manera ImSan mester liderazgo cla, specialmente den tempu di cambio.  Segun e statuto nan di ImSan, den 48 ora despues di fayesimento di Dr. Rajnherc, dos  director interino a wordo nombra, den espera di cuminsa e proseso pa un director  permanente.  Fortifica liderazgo no ta un obstaculo pa colaboracion, sino un condicion pa exito. Colaboracion ya ta funciona.  E afirmacion cu colaboracion no ta dunando sufisiente resultado no ta cuadra cu realidad. Colaboracion entre HOH i ImSan ya ta visibel y ta den desaroyo:  -Datonan medico ya ta accesibel pa specialistanan di HOH y ImSan, pa falicita  coordinacion directo den cuido di pashent;  -Den radio-oncologia, pashent nan ta wordu discuti huntu, cu ta resulta den miho  coordinacion di tratamento;  -Departamentonan di radiologia ya ta comparti imagenan, cu ta hasi diagnostico mas  eficiente i rapido evitando cu mester hasi un test dobel;  -Departamentonan di CSA ya tin tempo ta traha hunto, contribuyendo na uniformidad y  eficiencia;  -Departamentonan di SEH ta activo den desaroyo di protocol nan comun;  Esakinan ta resultado concreto di e Memoranda of Understanding (MOU), firma pa ambos  hospital. Colaboracion no ta un concepto teoretico, sino un proseso cu ya ta produci  resultado.  E forsa di ImSan Instituto Medico San Nicolas (ImSan) a demostra den poco tempo kiko desaroyo dirigi por  logra. Bou di liderazgo di Dr. Joel Rajnherc, d.f.m., hopi desaroyo a wordo realisa  rapidamente.  Entre otro:  -Departamento completo di Oftalmologia;  -Tres sala di operacion y departamento di sterilisacion (CSA);  -Departamento di radio-oncologia pa duna radiotherapia;  -Departamento di Dialisis  -Departamento di Radiologia;  -Departamento di emergencia (SEH);  -Un Medical-Surgical Unit cu a bira un departamento di hospitalisacion completo; -Un servicio di ambulans cu ta wordo modernisa continuamente  -HOED (Huisartsen onder een dak).  E desaroyo nan aki a resulta den:  -Menos referencia di pashent pa otro pais ;  -Reduccion di gastonan pa AZV;  -Miho accesibilidad di cuido.  No por keda sin menciona cu ImSan ta e unico hospital di reino hulandes di caribe cu ta  acredita pa JCI bou di liderasgo di Dr. Joel Raijnherc, d.f.m., cu ta un reconocimiento  internacional cu ImSan ta cumpli cu e standaard nan mas halto di cuido di pashent.  Fusion como solucion?  E argumento pa fusion ta basa riba supuesto mehoracion di eficiencia y reduccion di  gasto. Experencia nan internacional entre otro di Hulanda ta mustra cu fusion den cuido di  salud hopi biaha:  -No ta baha gastonan;  -Ta trese aumento di prijs;  -Por crea ineficiencia organisatorio;  Ademas, fusion ta semper bai man den man cu reorganisacion cu tin consecuencia pa  empleo pa e trahador nan y consecuencia pa continuidad di servicio pa e pashent nan. ⸻  Responsabilidad di stakeholders nan.  E yamada na politiconan, trahador nan di cuido, sindicato nan y policymakers nan pa “bai  mas aleu di voorzichtigheid ” mester wordu evalua criticamente.  Den cuido di salud , voorzichtigheid no ta debilidad, sino responsabilidad. E gruponan aki  tin e tarea pa:  -Respeta acuerdo nan tuma democraticamente;  -Keda critico riba cambio grandinan;  -Proteha contra decision nan cu no ta suficientemente fundamenta;  Finalmente mester implementa loke ya a wordu dicidi.  E “olifante roos” no ta un problema cu ainda mester wordu discuti. Ta un tema cu ya a  wordo discuti y disicion a wordu tuma.  E reto real ta den implementacion.  Colaboracion ya ta existi y esaki ta visibel. Pero por y mester bai mas lihe mas concreto y  mas consecuente.  No pa kibra structura nan pero pa cumpli cu acuerdo nan, acelera e proceso y fortifica  confiansa mutuo.  Futuro di cuido di salud na Aruba no ta den redefini loke ya ta cla, sino den realisa loke ya a  wordo dicidi.  Pasobra progreso no ta pidi un discucion nobo.  Ta pidi ehecucion di loke a wordo palabra.  Atentamente,  ISAA  ImSan’s Specialist Association Aruba The post Reaccion riba e “Olifanti ros den cashi”di Sr. Jacco Vroegop. appeared first on Aruba Native.