‘Dodenherdenking’: Recordando sacrificio pa proteha libertad

  Den un ambiente di respet profundo, Aruba a conmemora awe tardi e Ceremonia di Dodenherdenking, rindiendo homenahe na tur esnan cu a perde nan bida defendiendo libertad y dignidad humano durante Segunda Guera Mundial y otro conflicto di guera of mision di paz. E ceremonia, organisa door di Comision Celebracion Dianan Nacional (CCDN) hunto cu Gobierno di Aruba, a tuma luga na Urban Pocket Park, un espacio recientemente renoba, cu a crea un marco digno pa reflexion y memoria. Entre esnan presente tabatin Su Excelencia Gobernador Alfonso Boekhoudt, Prome Minister Mike Eman, Presidente di Parlamento Marlon Sneek, miembronan di Conseho di Minister y Parlamento, hunto cu representantenan di Marina Real, famia y hobenan di comunidad. Un momento central di ceremonia tabata e dos minuutnan di silencio, sigui pa colocacion di krans, como simbolo di respet pa esnan cu a sacrifica nan bida pa libertad. E acto aki a amplia su significado pa inclui no solamente e victimanan di Segunda Guera Mundial, pero tambe tur esnan cu a lucha pa paz y humanidad den diferente parte di mundo. Den su discurso, Prome Minister Mike Eman a invita comunidad pa reflexiona riba e balor real di libertad, un derecho cu no a bin vanzelfsprekend, pero tabata gana cu sacrificio. El a comparti e historia di Boy Ecury, un hoben di apenas 22 aña, kende a demostra corahe extraordinario durante e guera. Aunke e conflicto no tabata su mesun bataya, el a dicidi pa defende libertad y humanidad, poniendo su bida na riesgo. Segun e Prome Minister, e tipo di sacrificio aki ta recorda nos cu humanidad ta bay mas leu di frontera, cultura y origen. “Tin momentonan den historia caminda persona ta scoge pa defende no solamente un pais, pero humanidad mes. Esaki ta e tipo di ehempel cu nos mester tene presente,” el a expresa. E ceremonia a culmina cu un gesto simbolico di hobennan di diferente disciplina, incluyendo deporte y servicio social, cu a pone flor como muestra di gratitud y compromiso pa mantene e balor di libertad bibo den generacionnan cu ta bin. Dodenherdenking ta keda un recordatorio poderoso: cu un pueblo cu reconoce su pasado, ta miho prepara pa proteha su futuro.   The post ‘Dodenherdenking’: Recordando sacrificio pa proteha libertad appeared first on Aruba Native.