Ing. Carlos Bermudez (AVP): Inspeccion urgente den sector hotelero ta necesario p’e dignidad di e trahado

Despues di a haci publico su preocupacion serio tocante situacionnan den sector hotelero, Parlamentario Bermudez a manda un carta oficial na minister di Turismo y Labor. Den e carta Bermudez a puntra si minister ta dispuesto pa desaroya y implementa cu urgencia un plan di inspeccion specifico pa e sector. Despues di e declaracion, mas y mas trahado a tuma contacto cu su persona, compartiendo nan experiencia. Loke ta sali na cla ta sumamente alarmante. No solamente informacion digital ta circula, pero tambe a drenta kehonan den postbus. Entre e situacionnan menciona tin: Intimidacion y presion riba trahadonan; Rapportnan falso contra empleadonan; Suspension sin base solido; Retiro basa riba informacion incorecto sin duna oportunidad di defensa Falta di cumplimento di leynan laboral. Carta_Minister_Cicilia_HotelbrancheDescarga Varios di e kehonan tin relacion cu gerentenan stranhero. Sinembargo, Bermudez ta enfatisa cu no por generalisa: no tur manager stranhero ta causa di problema. Bermudez ta pone enfoke riba solucion. Segun e parlamentario di AVP, ta momento pa tuma accion firme y trata e problematica na su raiz. Esnan cu ta abusa di trahadonan mester wordo coregi, y si ta necesario, orienta pa compronde y respeta e leynan di Aruba. Respeta leynan laboral no ta opcion. Ningun hende ta para riba ley, y nos no por tolera abuso contra nos trahadonan, asina Bermudez a declara. Bermudez ta finalisa cu un yamada pa unidad y fortaleza: “Hunto nos ta mas fuerte.” The post Ing. Carlos Bermudez (AVP): Inspeccion urgente den sector hotelero ta necesario p’e dignidad di e trahado appeared first on 24ora - Prome Den Noticia.

4/21/2026 3:30:00 PM Read more