Aruba y Nacionnan Uni ta alinea prioridadnan pa cooperacion strategico y desaroyo sostenibel

  Prome Minister Mike Eman a sostene recientemente encuentro cu Joanna Kazana Wisniowiecki, Coordinador Residente di Nacionnan Uni pa Trinidad y Tobago, Aruba, Corsou, Surinam y Sint Maarten. E reunion, cu a tuma luga na Cocolishi, a reuni representante clave pa un intercambio strategico riba fortalecemento di cooperacion entre Aruba y sistema di Nacionnan Uni. E encuentro a brinda un oportunidad pa alinea prioridadnan, expectativa y siguiente pasonan, den preparacion pa e proximo bishita oficial di trabou di e UNRC programa pa luna di mei 2026. Durante e combersacion, a expresa aprecio pa e cooperacion continuo cu e Oficina di Coordinador Residente di Nacionnan Uni (UNRCO) na Port of Spain, y pa e dialogo constructivo estableci cu Aruba. Gobierno a enfatisa e importancia di e momento actual como un oportunidad strategico pa profundisa colaboracion y avanse na cooperacion concreto. Un di e temanan central tabata e preparacion pa e proximo bishita oficial di e UNRC. Prome Minister a duna bonbini na e iniciativa y a indica cu e bishita lo ofrece un plataforma importante pa sigui discusion riba prioridadnan identifica pa diferente ministerio, clarifica con sistema di Nacionnan Uni por brinda apoyo concreto na Aruba, y determina area di cooperacion cu ta realisabel pa 2026 y mas dilanti. Tambe a expresa interes den un presentacion formal di e UNRC na Conseho di Minister durante su estadia. Den e ambito di naturalesa, clima y medio ambiente, Gobierno a pone atencion riba e reto cu Aruba ta enfrenta como Small Island Developing State (SIDS), particularmente den acceso na financiamento internacional pa clima y naturalesa. Den e contexto aki, a invita e UNRC pa reflexiona riba con Nacionnan Uni por facilita acceso na recurso, asistencia tecnico y aliansa strategico pa fortalece resiliencia y sostenibilidad di e isla. Adicionalmente, a discuti e planificacion strategico di Aruba den relacion cu Agenda 2030 y implementacion di Sustainable Development Goals (SDG’s). Gobierno a confirma su intencion pa contribui na Voluntary National Review (VNR) di Reino Hulandes den 2027, como un oportunidad pa destaca solucionnan di isla chikito den un contexto di Reino. Den e mesun linea, a solicita perspectiva preliminar riba e Common Country Analysis (CCA) pa Aruba, cu lo forma un base analitico importante pa futuro cooperacion cu Nacionnan Uni. E rol di e Coordinador Residente di Naciones Unidas, como representante di e rango mas halto di sistema di desaroyo di ONU na nivel multi-pais, ta esensial pa coordina actividadnan, mobilisa financiamento y sigura alineacion cu prioridadnan nacional. Den e marco di e Multi Country Sustainable Development Cooperation Framework (MSDCF 2022–2026), cooperacion entre Aruba y Nacionnan Uni ta enfoca riba prosperidad, inclusion social, resiliencia climatico y gobernacion efectivo. Gobierno di Aruba ta considera e encuentro aki como un paso significativo den consolidacion di relacion multilateral, cu enfoke riba resultado concreto y cooperacion basa riba balornan comparti. Bou liderazgo di Prome Minister, e enfoke ta keda dirigi riba dialogo constructivo, preparacion strategico y implementacion di iniciativa cu ta contribui na bienestar sostenibel di pueblo di Aruba.   The post Aruba y Nacionnan Uni ta alinea prioridadnan pa cooperacion strategico y desaroyo sostenibel appeared first on Aruba Native.