Parlamentario Endy Croes: “AVP ta morto na soño! Rapport di FASE ta publico for di 2022, ta awo boso a lanta?”

ORANJESTAD – Den un intento desespera pa gaña pueblo, parlamentarionan di AVP a sali recien ta cuestiona e ayudo di FASE, basando nan mes riba un rapport di Algemene Rekenkamer (ARA) di e siman aki. Pero locual e “parlamentarionan patarucu” aki no sa, of kier sconde, ta cu e informacion aki ta publico caba for di 28 di april 2022.   E realidad di 2020: Un desicion entre hamber of burocracia Endy Croes a recorda pueblo cu na maart 2020, Aruba a keda impacta pa un pandemia di salud cu tawata tin un consecuencia financiero abrupto pa nos pais. SVB a calcula cu 25.000 empleado (58% di nos forsa laboral) lo a keda sin entrada. “Danki Dios cu ta Evelyn Wever-Croes y su Gabinete tabata na mando,” Croes a enfatisa. “Gobierno mester a scoge: yuda e pueblo mesora pa preveni hamber, of warda dos aña pa huristanan skirbi un ley mientrastanto bo yiu no tin nada di come.”   Kico ARA a bisa realmente den nan rapport di 2022? E rapport di ARA (2022) ta papia cla: Impacto Positivo: ARA a conclui cu door di brinda FASE na un forma generoso, Gobierno a duna un contribucion crucial pa preveni pobresa serio y hamber (SDG 1 y 2 di Nacion Uni). Onrechtmatig pero Necesario: ARA a califica e pagonan como “iligitimo” (onrechtmatig) UNICAMENTE pasobra no tabatin un ley e momento ey. Pero ARA mes a recomenda pa formalisa esaki “zo snel mogelijk”. Cumplimento a pie de la letra: Gabinete Wever-Croes a scucha conseho di ARA y dia 12 di juli 2022, Parlamento a aproba e ley (LV Tijdelijke FASE). Tarea cumpli!   AVP: “Bende patria” cu no ta haci nan huiswerk Awor, den maart 2026, ARA a publica e investigacion riba e aña fiscal 2020 (Jaarrekening 2020) caminda nan ta simplemente “ripiti” loke nan a skirbi 4 aña pasa. “E parlamentarionan di AVP manera Hart, Bermudez, Kelly, Sevinger y Jennifer ta un berguensa,” Croes a baha pisa riba nan. “Awor boso ta core sali cu articulo pa cuestiona FASE? Esaki ta duna di conoce cu boso NO a lesa e rapport di 2022. Boso ta zwak!” Segun Croes, e plan di AVP ta sushi: nan kier uza e palabra “onrechtmatig” (cu ya tabata conoci) pa purba hustifica e entrega di nos autonomia via HOFA. Nan kier convence pueblo cu Aruba mester wordo goberna pa Hulanda pasobra nan no sa kico ta un emergencia nacional.   “Spierta! Haci boso huiswerk!” Endy Croes a termina cu un mensahe fuerte pa e oposicion: “Educa boso mes prome boso papia disparate. Pueblo no ta bobo!” Ora Aruba tabata den crisis, MEP a scoge pa bo tin pan riba mesa, mientras AVP awe ta scoge pa bende nos autonomia! The post Parlamentario Endy Croes: “AVP ta morto na soño! Rapport di FASE ta publico for di 2022, ta awo boso a lanta?” appeared first on Aruba Native.