Minister Dowers ta tuma accion coordina pa restablece orden y siguridad den trafico

Diamars merdia, Minister di Husticia, Integracion, Transporte Publico y Energia mr. drs. Arthur Dowers a reuni cu e comision di siguridad den trafico, cu ta consisti di representante di KPA, DTI, DWJZ y Ministerio Publico, pa discuti e situacion actual den trafico y e preocupacionnan creciente den comunidad. E reunion a tuma luga den un contexto unda a observa un aumento den accidente di trafico, hunto cu señalnan serio for di comunidad tocante e uzo for di control di vehiculonan electrico manera e-steps, e-scooters y fatbikes. E desaroyo aki a bay for di man y ta crea riesgo tanto pa conductor como pa peaton. Durante e encuentro, e comision a comparti nan evaluacion profesional di e situacion y a presenta consehonan concreto na e mandatario tocante e direccion cu mester sigui. E consehonan aki ta basa riba experencia practico, conocemento tecnico y analisis di e marco legal existente. Minister Dowers a enfatisa cu e situacion actual no por sigui y cu ta necesario pa tuma accion decisivo pa reestablece orden den trafico. Den coordinacion estrecho cu e instancianan relevante, ta trahando riba un pakete di medidanan pa fortalece cumplimento, clarifica reglanan y aumenta siguridad riba caminda publico. Dentro di algun dia, Minister Dowers lo presenta su maneho y medidanan specifico den un conferencia di prensa, cu e meta pa trece claridad na comunidad y restablece trankilidad den trafico. Gobierno ta comprometi pa proteha siguridad di tur usuario di camindanan publico y pa garantisa un sistema di trafico cu ta funciona di un manera responsabel y sostenibel. The post Minister Dowers ta tuma accion coordina pa restablece orden y siguridad den trafico appeared first on Aruba Native.

4/14/2026 6:27:34 PM Read more