[ata: foa'i]
By LALI STAFFPago Pago - AMERIKA SAMOA
Ae e le’i malolo ia le maota fono i le vaiaso ua tuanai, na fa’ataunu’uina ai e le komiti o le Enetia, Eletise ma le Suavai, a le Senate, sa latou iloiloga e tusa ai ma le auaunaga a le vaega a le ASPA e gafa ma le aoina o lapisi.
I le iloiloga i le aso 21 o Mati, 2025, lea na fa’afoeina e le afioga i le Senatoa ia Ponausuia L. Ponausuia, sa o latou mataituina ai auaunaga a le ASPA tau lapisi, lea o lo’o fa’akonakarate i pisinisi tua.
O le afioga ia Ponausuia, o se tasi sa galue i le ASPA. O molimau o lea iloiloga, na aofia ai le Pulesili a le ASPA ia Wallon Young, o le susuga ia Ryan Tuato’o lea o lo’o faafoeina le ofisa a le Customer Service faapea le susuga ia Talimatagi Elisara Su’a, le pule o le vaega o Suavai ma lapisi lafoa’i.
I le amataga o le iloiloga, na fofogaina ai e le susuga i le peresetene o le Senate, le afioga i le Senatoa ia Tuaolo M. Fruean, ia se talosaga mai i le afioga i le Ma’oputasi, Mauga Tasi Asuega, ina ia su’esu’e le mafuaaga e le o tatalaina ai e le ASPA ia le galuega mo le aoina o lapisi i kamupani tua. Na fa’aleoina e le afioga Tuaolo ia se popolega e tusa ai ma lenei mataupu, aemaise ai o afioga i Senatoa ia Utu Sila Poasa ma Leatualevao S. Asifoa, e pulea ni pisinisi la’u lapisi.
Sa saunoa Talimatagi, o lo’o aofia foi kamupani tua i tauofoga mo konakarate la’u lapisi, lea na maua ai e le kamupani a le afioga Mauga, ia lea konakarate.
O lea na fesiligia ai e Tuaolo le mafuaaga ua toe fa’atau ai e le ASPA a latou lava ta’avale la’u lapisi.
Na fa’amalamalama mai e Talimatagi, ina ua tapunia pisinisi i le tausaga e 2020 ona o le komiti 19, na a’afia nisi o le atunu’u i le vairusi, o iina na ia faia ai le fa’ai’uga ina ia mafai ona fa’aauauina lenei auaunaga taua, aua le faatumauina o se siosiomaga mama.
Sa ia fa’amanino mai i lana molimau e faapea, ana taofia le aoina o lapisi i lena vaitaimi, semanu o le a lapisia luma o fale o aiga ma totonu o nu’u, ona o faiga a taifau ma ono faateteleina ai le pipisi o le fa’ama’i.
Na saunoa foi Talimatagi, i lena vaitaimi, sa fa’aaogaina ai taavale laupapa e la’u ai lapisi, lea sa masani ona fa’aaoga ai ni neti e taofi ai lapisi mai i le toe pa’u’u i lalo o le taavale. Ae peitai, o se tulaga le saogalemu i le ola o le tagata ma le soifua maloloina.
Sa fa’aalia e le pule o le vaega o lapisi ia lo latou soalaupuleina o lenei mataupu ma le pulesili o le ASPA ma faia ai se faaiuga mo le fa’atauina o taavale lapisi patino mo le la’uina o lapisi, lea e fa’aaoga i atunu’u i fafo. O nei ta’avale o lo’o iai vaega faapitoa e mafai ona lifiina le lapisi ma sasa’a i totonu o le taavale ma le malu puipuia o le lapisi, e aunoa ma le toe masa’a mai i fafo.
Ma ua faapea foi ona fa’asaoina mai ai le aufaigaluega mai i le galuega fita o le si’i ina o kalone lapisi mamafa faapea ai ma le a’afia o i latou i le manogi leaga o lapisi. Sa ta’ua e Talimatagi, o le tau o taavale lapisi fou, lea ua fa’atauina e le ASPA, e $300,000 i le taavale e tasi, ma e lua taavale ua faatauina e le ASPA, na fa’aaoga ai se vaegatupe mai i le Ofisa o le Initeria.
Sa ta’ua e Talimatagi, i le vaitaimi o pepesi le koviti, na toatele nisi o le aufaigaluega a le ASPA na le faigaluega, ae peitai, e le’i faapena le latou vaega. Sa o latou fa’aaogaina ni la’ei faapitoa e puipui ai i latou mai i le vairusi.
Na faamanino foi e Talimatagi, ua fa’atauina e le ASPA nei taavale fou, ina ia lagolagoina ai kamupani lotoifale, e le o iai le tamaoaiga e faatauina ai nei taavale. O le fa’atulagaga fou lea ua iai, e faatau e le ASPA ia le taavale ma le aveta’avale, ae o kamupani lotoifale e maua mai ai le aufaigaluega e faatinoina le galuega, aemaise o lapisi lea e pa’u’u i lalo.
Sa fa’amanino mai foi e Talimatagi ia ituaiga lapisi ‘ese’ese e tolu, lea e tofu ma ituaiga taavale e manaomia ai.
O ta’avale lea ua fa’atauina e le ASPA, e mo le aoina o lapisi a aiga, ae o u’amea (scrap metal) o lo’o aoina e taavale a le kamupani a le afioga i le Senatoa Leatualevao Asifoa; ae o lapisi u’amea tetele, lea o lo’o fa’aaogaina e pisinisi i totonu o le atunu’u, o lo’o aoina i taavale a le kamupani a le afioga Mauga.
Na fesiligia e Tuaolo ia Talimatagi e tusa ai ma le fa’asea a le afioga Mauga, ae o ana taavale ia o lo’o fa’akonakarateina mo le aoina o le lapisi. Sa ta’ua e Talimatagi, e na te le o mautinoa lelei le uiga o le fa’asea a le afioga Mauga, ae o lo’o iai sona talitonuga, atonu e mafua ona e le o maua atoa le totogi o le latou galuega o lo’o faatinoina, lea o lo’o taofi Talimatagi, e mafua ona e le o fa’atino atoatoa e le kamupani ia aiaiga o la latou konakarate.
Sa fesiligia foi e Tuaolo ia le tulaga o se fa’alavelave e ono a’afia ai se tasi o le aufaigaluega a kamupani konakarate, i le taimi o faataunu’uina ai le galuega, po o ai o le a pa’u iai lea tulaga.
Na tali mai le pulesili a le ASPA, ia Wallon Young, e fua lava i luga o le faalavelave. Afai e mafua le fa’alavelave ona o se faaletonu i masini a le ASPA, o lona uiga, e pa’u i luga o le ASPA. Ae afai e mafua le faalavlave ona o le konakarate, ia o latou e pa’u iai le faalavelave.
Sa tuliloa mai e Tuaolo ia lana fesili i lona faamatalaina o se faalavelave na tula’i mai, lea na lavea ai se tagata faigaluega a le kamupani konakarate, a’o ia fa’aaogaina le taavale a le ASPA. Na tali vave mai ia Young, o lona uiga, e pa’u le faalavelave i luga o le ASPA.
Na toe fesili Tuaolo pe mafai e le ASPA ona faatauina atu ana taavale la’u lapisi i kamupani tua. Sa tali mai Talimatagi, e le mafai ona o aiaiga ma le Ofisa o le Initeria.
Sa saunoa foi Tuaolo e tusa ai ma le tele o tupe maua o lo’o aoina e le ASPA mai ana auaunaga ‘ese’ese, ae e leai se vaegatupe o alu agai i le teugatupe lautele a le malo. Ma na saunoa ai Tuaolo, e foliga mai o lo’o fausia e le ASPA sona lava malo i totonu o le malo.
I se saunoaga a le afioga i le Senatoa Utu Sila Poasa, sa ia ta’ua ai e faapea, e tusa ai ma molimau a taitai o le ASPA, ua tele ni fa’asea ua o’o atu i lo latou ofisa ona o faaletonu i la latou auaunaga. E le gata i lea, o lea ua fa’amaonia i le molimau a Talimatagi le latou tipiina o peimeni a kamupani, ona o le le ausia o nisi o a latou aiaiga faalekonakarate.
O le fesili a Utu, afai e le o tulaga le faatinoga a nei kamupani po o konakarate, aisea ua le toe tatalaina ai konakarate mo tauofoga.
Na faamanino mai e Young e faapea, o konakarate ua mae’a ona fa’afouina faapea, ma e toe tatalaina mo tauofoga pe a mae’a le taimi fa’atulagaina e faamuta ai lea konakarate.
Sa fesiligia e Utu ia tupe aoina fa’aletausaga mai i pili mo le aoina o lapisi. Na ripotia mai e Young, e pe a ma le $3.6 miliona e aoina i le tausaga ma e fitu kamupani lotoifale lea o lo’o faakonakarate nei mo le aoina o lapisi.
Na saunoa foi Young, o lo’o iai foi le lapisi tele i Futiga o lo’o tausia e le ASPA ma e le tele se tupe e maua mai i le aoina o lapisi, o le mafuaaga lea e latou taumafai ai ina ia lava le tupe e fa’aalu, ina ia alo’ese mai i le sii o pili ma faamalie ai le mamalu o le atunu’u.
Sa ioe Young i le tele o fa’asea mai i le mamalu lautele e tusa ai ma le faatinoga o galuega la’u lapisi. Ma sa ia faamanino mai e faapea, o so’o se taimi e le ausia ai e kamupani po o konakarate ia aiaiga i totonu o a latou konakarate, e tipi e le ASPA a latou peimeni ma o se tulaga e le fiafia ai nei kamupani.
E tusa ai ma le fesili a Utu i le tau faalemasina mo konakarate o le aoina o lapisi, sa fa’ailoa mai e le pulesili a le ASPA le fa’aaluina e le ASPA o le $70,000 i le masina i le aoina o lapisi, ae e aoina fa’atolu i le vaiaso ia le lapisi. Ae peitai, o le tele o taimi e le fa’atinoina e kamupani tua po o konakarate, ia lea tulaga, ae o lo’o manana’o e fa’aatoa ai a latou peimeni.
Ma o le mafuaaga lea ua fa’atauina ai e le ASPA ia taavale lapisi fou, ina ia faamautuina ai le fa’atinoina o le auaunaga o lo’o totogi e tagata o le atunu’u. Ma o le a fa’atumauina lea tulaga, se’ia mae’a konakarate o lo’o iai nei.
Sa fa’amanatu atu e Utu i le pulesili o le ASPA, o lana kamupani o lo’o konakarate mo le tolu tausaga, ma na toe faaopoopo leisi tolu tausaga. Ae e na o le $1.3 miliona na totogi ai lana kamupani i le tausaga e tasi, ae o le tupe aoina a le ASPA mai i le aoina o lapisi, e silia ma le $2 miliona i le tausaga. Ma sa saunoa Utu, atonu o le mafuaaga o le leaga o le auaunaga a le konakarate o iai nei, ona o le laititi o le latou tupe maua, pe a fa’atusatusa atu i le tupe sa maua e lana kamupani.
Na fa’aalia e Utu le auai o lana kamupani i tauofoga mo lenei auaunaga, ae peitai, sa maua e leisi kamupani le galuega, mo se tau itiiti. Ma atonu o le mafuaaga lea o le faaletonu o le auaunaga.
Ae peitai, sa fa’ailoa mai e Young, o le kamupani a le Senatoa sa le na’o le aoina o lapisi a aiga, ae na maua foi e latou le konakarate mo le lapisi tele, ma atonu o le mafuaaga lea na maua ai e le kamupani a le Senatoa I le $1.3 miliona i le tausaga. Pe a fa’atusatusa atu i le konakarate o iai nei, e na’o le tasi le galuega o lo’o latou faatinoina, mo le $70,000 i le tausaga.
Section: Le Lali
View the discussion thread.