[ata: foa'i]
By Cornelia TuioletaiPago Pago - AMERIKA SAMOA
I le aso Faraile o le vaiaso ua mavae, Mati 14, 2025, sa faatumulia ai le falesa a le Ekalesia a Iesu Keriso o le Au Paia o Aso e Gata Ai, i le afioaga o Malaeimi aua le faiga konefesi fa’aletausaga a le Siteki a Pago Tutotonu. Lea sa fa’amanatuina ai ma le 183 tausaga o le fa’alapotopotoga a Tina ma tamaitai po o le Aualofa (Relief Society) talu ona faavaeina ia Mati 17, 1842.
E tolu aso sa fa’ataunu’uina ai lenei faamoemoe. Lea sa tatalaina i se po fiafia i le afiafi o le aso Faraile ae fa’amae’aina i se Sauniga Lotu faapitoa, i le aso Sa, Mati 16, 2025.
Sa fa’apea foi ona valaaulia ai foi nisi o ta’ita’i o le Ekalesia mai Samoa ma ,Amerika Samoa o loo galulue faamisiona i Samoa lea sa o latou maua ai se avanoa, e fa’asoa ni o latou manatu e tusa ai ma o latou valaauga ma molimauina fo’i se taumafaiga a Pago Central Stake.
I le polokalama o le afiafi o le aso Faraile sa faapea ona faia ai se fa’aaliga siva mai i Iunite e fitu o lo’o aofia i totonu o le Siteki a Pago Tutotonu. Na tofutofusia iunite ma le iutaiga siva uosi (waltz) ma sa molimauina le matagofie o tapenapenaga a iunaite eseese, o laei ma teuga eseese, ae le gata i lea o le sagisagi fiafia mai o iunite taitasi, e amata mai i tama ma tina matutua, se’ia pa’ia fanau iti.
I le faamanatuina o le aso fanau a le fa’alapotopotoga a le Aualofa, sa faapea ona tapena ai e taitai o le Aualofa a le Siteki ia se keke aso fanau, e faamanatu ai le aso faapitoa a lenei fa’alapotopotoga taua, e le gata i totonu o le talalelei ae faapea foi i totonu o Amerika Samoa atoa.
I se fa’asoa mai a nisi sa mafai ona auai i lea fuafuga i le po o le aso Faraile, na o la saunoa mai ai e faapea, “Lagona lava le agaga fa’agae’etia ma le agaga fa’afetai e tusa ai fo’i ma nei avanoa matagofie e mafai ai fo’i ona fa’asoa ai ni taleni ma fa’amalosia ai foi le va lelei nonofo ai fa’a le uarota ma le siteki fo’i. Fa’afetai foi le Peresitene o le Siteki ma ona Fesoasoani faapea ta’ita’i uma a le siteki ma uarota foi le manatunatu i gaioiga fa’apea e faamalosi ai foi nisi o le aupaia. Ma maua ai le avanoa e faamalosia ai a matou molimau”.
O le susuga i le Fa’aao o le Siteki, le susuga i le Peresetene ia Eleniko Kelemete na saunoa fa’ai’u i le tapunia o le po fiafia ma na ia fa’aaliga lona lagona fa’afetai i tulaga ma vaega eseese na fa’ataunu’uina i lea po. Ma sa faapea ona ia tu’uina atu se fa’amanuiaga faaletaitai i e uma na auai i lea afiafi.
Na fa’aauauina le konefesi fa’aletausaga i se sauniga lotu i le afiafi o le aso Toona’i ma sa faapea ona fa’atumulia i tagata o le aupaia. Sa faamanuiaina ai nisi o le au paia o lo’o galulue fa’afaifeautala’ai ma nisi ua fa’amae’aina mai, e tautalagia lea lava afiafi.
O le manulauti o lea afiafi, o le Auaunaga Fa’afaifeautala’i.
Sa fa’asoa mai foi se tasi o tina sa auai i lea sauniga e faapea, “O a’u e le’i mafaufauina oute auai le sauniga. Sa maua lava a’u i le fa’apalapala peita’i ane sa lagona lava musumusuga a le agaga e tatau ona ou fa’amalosi mai. O le mea la lea oute fa’afetai tele ai i lo’u Tama Fa’alelagi ona o le tata’i mai o au lenei afiafi ua ou maua ai se lesona tele ma le aoga mo a’u aua fo’i le fa’atautaia ai o si a’u fanau i totonu o lo’u aiga ae mai se ai foi le Tama o le aiga i ni fautuaga lelei foi ua ou maua mai molimau ma lauga. Ua ou iloa ai nei e tatau ia te a’u ona ou fa’amuamua le Atua soo lava se vaega. Tatau ona ou fa’amalosi isi a’u fanau talavou e ala i le faia lea o le finagalo ole Tama Fa’alelagi ae le’o le ‘oa o le lalolagi”.
O lauga faapitoa o lea afiafi, na aofia ai le Peresetene o le Malumalu a le ekalesia o lo’o i Apia, Samoa ma si ona faletua, ia . Ae le gata i lea, o le susuga i le sui Peresetene o le Misiona a Apia, Samoa, le susuga ia John Pitoitua ma lona faletua ia Tracy Ma’ae-Pitoitua.
O le aso Sa na soso’o ai, po o le aso mulimuli o le konefesi fa’aletausaga a le Siteki a Pago Tutotonu, sa lagiina ai e fanau iti mai i le 8-10 tausaga le matutua, ia le sauniga lotu faapitoa e tapunia aloaia ai le konefesi faaletausaga.
O le susuga i le Peresetene o le Misiona a Apia, Samoa, ma o se tasi foi o lupe fa’alele a Amerika Samoa, le susuga ia Peresetend Adney Reid ma le faletua ia Tina Fonoimoana Reid, na avea ma fofoga faapitoa o lea sauniga lotu.
Sa maua ai foi avanoa a nai fanau talavou o le a fa’apea ona tu’ua aiga ae o atu e tau le taua aua le Atua ma lona finagalo. Sa molimauina le matagofie ma le aoga o lenei faiga Konefesi i le mamalu o le aofia a Pago Central Stake ma nisi o uo asiasi.
Section: Le Lali
View the discussion thread.